275 МЫҢ ГЕКТАР АЛҚАП ӨҢДЕЛДІ
Оңтүстіктің берекелі топырағында егін егіп, маңдай терін төгіп жүрген диқандар мен шаруалардың бүгінгі таңдағы ең басты уайымы мен қатерлі жауы – шегіртке зиянкесі болып тұр. Күн жылына сала қанаттанып, егіс алқаптары мен жайылымдық жерлерге ауыз салатын бұл жәндікпен күрес Түркістан облысының аумағында өте жоғары қарқынмен және жүйелі түрде жүргізіліп жатыр. Қазіргі уақытта аймақтың 9 бірдей ауданында 300 мың гектарға жуық кең-байтақ алқапты толықтай химиялық өңдеуден өткізу жұмыстары қызу қолға алынды. Жер емген шаруаның маңдай тері мен елдің несібесін қорғау мақсатында жүріп жатқан бұл ауқымды науқан тікелей билік өкілдерінің жіті қадағалауында тұр. Осы ретте облыс әкімінің орынбасары Нұрбол Тұрашбеков арнайы жұмыс сапарымен Ордабасы ауданына барып, сол жердегі химиялық дәрілеу жұмыстарының барысын өз көзімен көріп, бақылап қайтты.
Ордабасы ауданының басшылығы қазіргі таңда үш бірдей жауапты сектордағы ахуалдың мән-жайын баяндап, атқарылған істердің нәтижесін алға тартты. Мәселен, бүгінгі күнге дейін ауданға қарасты Қараспан, Қажымұқан, Бөржар және Бадам ауылдық округтерінің аумағында жалпы көлемі 12 522 гектар жерге арнайы химиялық өңдеу жасалып үлгерген. Майдан даласындағыдай ұйымшылдықты талап ететін бұл жұмысқа жеңімпаз мердігер мекеменің 10 техникасынан бөлек, істің өнімділігін арттыру мақсатында қосымша тағы 17 арнайы техника жұмылдырылған. Сонымен қатар, зиянкестердің шоғырланған негізгі ошақтарын ерте анықтап, уақытылы залалсыздандыру үшін 70-тен астам білікті маман мен жұмысшы тынымсыз еңбек етуде. Ең бастысы, қауіпті жәндіктің көзін жоюға қажетті сапалы химиялық препараттардың қоры жеткілікті және оны тасымалдауда ешқандай кедергілер жоқ. Тексеру барысында облыс әкімінің орынбасары мобильді топтардың жұмысын ширатып, дәріленген аумақтарды міндетті түрде қайтадан сүзгіден өткізуді және көршілес ауданаралық шекаралық аймақтардағы бақылауды барынша күшейтуді шегелеп тапсырды.
Орталық штабтың берген ресми мәліметтеріне сүйенсек, жалпы Түркістан облысы бойынша шегіртке зиянкесінің таралу қаупін анықтау мақсатында 796,88 мың гектардан астам аса үлкен аумақ мұқият зерттелген. Соның нәтижесінде 285,71 мың гектар жерде зиянкестердің тығыздығы экономикалық зияндылық шегінен асып кеткені белгілі болды. Бұл дегеніміз – шұғыл шара қолданбаса, шаруалардың еңбегі еш кетіп, өнімнің бір сәтте жоқ болу қаупі жоғары болды деген сөз. Сондықтан да тиісті мекемелердің үйлесімді жұмысының арқасында қазірдің өзінде 275,11 мың гектар алқап химиялық өңдеуден сәтті өтіп, зиянкестердің қанатын жайып үлгеруіне тосқауыл қойылды. Осынау жауапты әрі ауыр еңбекке облыс бойынша жалпы 250 дана арнайы техника мен су жеткізуді үздіксіз қамтамасыз ететін 51 су тасымалдаушы көлік тартылып, жұмыс істеп тұр.
Облыс ішіндегі географиялық көрсеткіштерге көз жүгіртсек, химиялық өңдеу жұмыстарының ең үлкен көлемі Келес ауданына тиесілі болып отыр, мұнда 140 мың гектардан астам жер дәріленді. Сондай-ақ, Сарыағаш ауданында 57 мың гектар, ал Арыс қаласына қарасты аумақтарда 51 мың гектардан астам жер зиянкестерден тазартылды. Оңтүстіктің өзге де аймақтары, атап айтқанда Бәйдібек, Шардара, Түлкібас, Сауран және Қазығұрт аудандары да бұл күрестен тыс қалып жатқан жоқ. Аталған аудандарда да қауіпті зиянкестердің бетін қайтару және олардың жаппай көбеюіне жол бермеу бағытындағы жұмыстар бекітілген жоспарға сай, жүйелі әрі сапалы жүргізілуде. Мемлекет тарапынан көрсетіліп жатқан осындай дер кезіндегі көмек пен мамандардың қажырлы еңбегі оңтүстік өңірдің ауыл шаруашылығы әлеуетін сақтап, диқандардың биылғы жылғы өнімінің берекелі әрі ырысты болуына берік негіз қалайтыны сөзсіз.
