ТҮРКІСТАНДА САЛЫНАТЫН ЖАҢА ЖОБАЛАР ТАЛҚЫЛАНДЫ
Түркістан өңірі бүгінгі таңда еліміздің заманауи урбанистикасы мен сәулет өнерінің де басты орталығына айналып келеді. Мемлекет басшысы Қасым-Жомарт Тоқаевтың көне шаһардың тарихи бірегейлігін сақтай отырып, оны заманауи үлгідегі халықаралық деңгейдегі рухани әрі туристік орталық ретінде дамыту жөніндегі стратегиялық пайымын негізге алған Түркістан облысында бүгінде құрылыс пен абаттандырудың жаңа жасампаз кезеңі басталды. Аймақтың сәулеттік әлеуетін арттырып, шаһар келбетін жаңа сапалық деңгейге көтеру бағытында атқарылып жатқан ауқымды жұмыстар жақында Түркістан облысының әкімі Нұралхан Көшеровтің төрағалығымен өткен алқалы мәжілісте жан-жақты сараланып, алдағы уақытта еңсерілуі тиіс маңызды міндеттер айқындалды.
Түркістан облысының әкімі Нұралхан Көшеровтің төрағалығымен өткен бұл кезекті жиын өңірде бой көтеретін жаңа ғимараттар мен маңызды инфрақұрылымдық жобалардың сәулеттік келбетін талқылауға арналды. Мәжілісте әсіресе Келес ауданы мен Түркістан қаласының аумағында жүзеге асырылуы жоспарланған, аймақтың әлеуметтік және туристік тынысын ашатын бірқатар маңызды бастамалар егжей-тегжейлі қаралды. Жиын барысында облыстың бас сәулетшілері мен жас мамандары тарапынан 7 бірдей бірегей сәулеттік жоба таныстырылып, жас сәулетшілер өңірді дамытуға бағытталған өздерінің тың ұсыныстары мен креативті идеяларын ортаға салды. Әрбір жобаның мазмұнына үңілген өңір басшысы жауапты тұлғаларға нақты тапсырмалар жүктеді. Ол құрылыс саласындағы сәулеттік талаптардың қатаң сақталуына, заманауи халықаралық үрдістер мен ұлттық нақыштың үйлесім табуына, сондай-ақ жергілікті тұрғындар мен қонақтар үшін қолайлы, қауіпсіз әрі сапалы орта қалыптастыруға баса мән беру қажеттігін айтып, жобаларды сапалы іске асыру бойынша тиісті жұмыстарды жеделдетуді міндеттеді.
Кеңес отырысында талқыланған жобалардың ауқымы өте кең. Атап айтқанда, Келес ауданында заманауи үлгідегі су спорт кешенін салу, әлемдік маңызы бар Қожа Ахмет Ясауи кесенесінің маңын қоршау және қауіпсіздігін күшейту мәселесі сөз болды. Сонымен қатар, Түркістан қаласында мемлекеттік маңызы бар ауқымды іс-шараларды жоғары деңгейде өткізуге мүмкіндік беретін зәулім Рәміздер алаңын тұрғызу, халықаралық жол бойында үлкен жүк көліктеріне жан-жақты қызмет көрсететін арнайы логистикалық орталық ашу және өңірдегі бұқаралық спортты өрге домалататын жаңа футбол академиясын құру секілді ірі жобалар жан-жақты талқыланды. Мұнымен қоса, шетелдік және отандық саяхатшыларды баурап алатын бірегей туристік жобалар ұсынылды. Бұл ретте Түркістан қаласындағы орталық базар аумағында туристерге арналған жаңа заманауи нысандар ашу мәселесі ерекше қаралды. Жобаның басты мақсаты – базар аумағын жай ғана сауда-саттық орны ретінде қалдырмай, оны Түркістанның мәдени нақышын көрсететін негізгі туристік нүктелерінің біріне айналдыру болып табылады. Осы орайда Көне Арбаттың сәулеттік келбетін жаңғырту, қаланың туристік және ландшафтық тартымдылығын арттыру мақсатында шаһар ішінен хош иісті өрік бағын орналастыру, туристік маршруттар жүйесін заман талабына сай жетілдіру ұсынылды. Саяхатшыларға ыңғайлы болуы үшін арнайы саяхатшы паспорты мен маршруттар картасын әзірлеу, сондай-ақ қоршаған ортаға зиянсыз, туристерге қызмет көрсететін электрокар бағытын жаңарту бойынша құнды ұсыныстар айтылды.
Одан бөлек, шаһардың бас күре тамыры саналатын Тәуке хан даңғылын абаттандыру және қайта жаңғырту, туристер мен қала тұрғындарына арналған ыңғайлы жаяу жүргіншілер жолдарын салу, көшелерді көріктендіру, қолданыстағы ғимараттардың қасбеттері мен сәулеттік келбетін жақсартып, оларды туристік тартымды ету мәселелері де назардан тыс қалмады. Мәжіліс соңында қаланың жаңа бөлігі – Әкімшілік-іскерлік орталық аумағында құрылысы қарқынды жүргізіліп жатқан нысандардың жұмыс барысы мен бүкіл түркі әлемінің бірлігін паш ететін Түркі елдерінің орталығын салу жобасы баяндалды. Түркістанның топырағында бой көтеретін бұл жасампаз жобалар алдағы уақытта да облыс әкімінің тікелей қатаң бақылауында болып, көне шаһардың атақ-даңқын асқақтата түспек.
