ТҮРКІСТАН ОБЛЫСЫ ӘКІМІНІҢ КЕЗЕКТІ ҚОҒАМДЫҚ ҚАБЫЛДАУЫ ӨТТІ
Мемлекет басшысы Қасым-Жомарт Тоқаев өзінің Жолдауларында «Халық үніне құлақ асатын мемлекет» тұжырымдамасын орнықтыру, азаматтардың мұң-мұқтажына дер кезінде назар аударып, билік пен қоғам арасындағы ашық диалогты күшейту жөнінде маңызды тапсырмалар жүктегені белгілі. Осы ретте Түркістан облысында халықпен кері байланысты нығайту, мемлекеттік органдар қызметінің ашықтығын қамтамасыз ету және тұрғындардың өзекті мәселелерін жедел әрі сапалы шешу бағытындағы жұмыстар тұрақты жүзеге асырылып келеді.
Таяуда Түркістан облысының әкімі Нұралхан Көшеров кезекті қоғамдық қабылдау өткізіп, 150-ге жуық азаматтың жеке өтініші мен ұсынысын мұқият тыңдады. Ашық әрі еркін пікір алысу форматында өткен бұл жиында тұрғындар көтерген әрбір түйткілді мәселе мұқият қаралып, заң шеңберінде тиісті шешімдер қабылданды. Халықпен тікелей кездесіп, олардың арыз-шағымын, өтініші мен ұсыныс-пікірін өз аузынан тыңдау – өңірдегі нақты әлеуметтік ахуалды шынайы бағалаудың және қордаланған мәселелерді нәтижелі шешудің ең тиімді құралы болып табылады. Қабылдауға облыс әкімінің орынбасарлары, салалық басқарма басшылары, аудандар мен қалалардың әкімдері, сондай-ақ құқық қорғау және өзге де мемлекеттік мекемелердің жауапты өкілдері қатысты. Олар тұрғындар тарапынан қойылған әртүрлі сауалдарға жан-жақты жауап беріп, қолданыстағы заңнамалар аясында егжей-тегжейлі түсіндіру жұмыстарын жүргізді. Қоғамдық қабылдау барысында тұрғындар негізінен баспанамен қамту, әлеуметтік көмек тағайындау, денсаулық сақтау қызметі, жұмысқа орналасу, жер қатынастарын реттеу және инфрақұрылымды дамыту мәселелерін алға тартты. Әрбір өтініш жеке-жеке зерделеніп, заң талаптарына сәйкес шешу жолдары талқыланды. Бірқатар өзекті сауалдар қабылдау кезінде-ақ оң шешімін тапса, уақыт пен жүйелі шараларды талап ететін күрделі мәселелер жауапты органдардың бақылауына алынып, оларды кезең-кезеңімен шешу жөнінде нақты тапсырмалар берілді. Әсіресе жер мәселесіне қатысты көтерілген сауалдарға облыс әкімі заң талаптарының қатаң сақталатынын кесіп айтты. Оның атап өтуінше, инженерлік инфрақұрылымы тартылмаған жер телімдерін халыққа үлестіріп беру мүмкін емес. Сонымен бірге жер кезегінде тұрған азаматтардың құқықтары толық сақталатыны, кезектен тыс немесе заңсыз шешімдерге мүлде жол берілмейтіні ашық білдірілді.
Қабылдау барысында кейбір тұрғындар жергілікті ауылдық округ әкімдерінің жұмысына қатысты сын-ескертпелерін білдіріп, басқару аппаратының жауапкершілігін күшейтуді сұрады. Облыс басшысы барлық айтылған уәждер мен өтініштер мұқият тексеріліп, заң шеңберінде тиісті шешімдер қабылданатынын жеткізді. Баспана мәселесі де қабылдаудың басты тақырыптарының біріне айналды. Әкім тұрғын үй кезегі заңнамалық талаптарға сай ретпен жүргізілетінін, ешкімнің құқығы бұзылмайтынын және кезекті негізсіз жылжытуға тыйым салынатынын ескертті. Сондай-ақ ол Түркістан облысының тұрғын үймен қамту көрсеткіші бойынша еліміздегі көшбасшы өңірлердің бірі екенін айтып өтті. Бүгінгі таңда өңірде жыл сайын шамамен 1 миллион шаршы метр тұрғын үй пайдалануға беріліп, баспана құрылысының қарқыны тұрақты өсіп келеді. Бұл халықты кезең-кезеңімен баспанамен қамтамасыз етуге толық мүмкіндік береді. Кездесуді қорытындылаған өңір басшысы Нұралхан Көшеров: «Халықтың сенімі – мемлекеттік қызметтің ең үлкен бағасы. Сондықтан әрбір азаматтың өтініші мен ұсынысы ерекше назарға лайық. Жеке қабылдау – тұрғындардың өзекті мәселелерін тікелей тыңдап, оларды шешу жолдарын бірге қарастыратын маңызды алаң. Ашық диалог өзара түсіністік пен сенімді нығайтады. Халықтың әрбір мәселесін тұрақты назарда ұстау – біздің басты міндетіміз. Әрбір өтініш пен ұсыныс жан-жақты зерделеніп, заң аясында нақты шешімін табуы тиіс. Азаматтардың мұң-мұқтажына дер кезінде ден қою – мемлекеттік қызметтің негізгі қағидаты. Халықтың сенімін ақтау үшін нақты нәтиже мен тиімді жұмыс қажет. Тұрғындардың әл-ауқатын арттыруға бағытталған барлық бастамалар бақылауда болады және кезең-кезеңімен жүзеге асырылады. Елге адал қызмет ету – үлкен жауапкершілік әрі абырой. Мемлекет басшысы Қасым-Жомарт Тоқаев халыққа арнаған Жолдауларында азаматтардың өмір сүру сапасын арттыруды мемлекеттік саясаттың басты бағыты ретінде айқындап келеді. Осындай кездесулерде біз атқарылған жұмыстардың нәтижесін ғана емес, тұрғындардың жаңа ұсыныстары мен өзекті мәселелерін де тыңдап, оларды шешу жолдарын бірлесіп қарастырамыз. Өйткені халықтың сенімі мен аманаты – біздің басты жауапкершілігіміз, ал әрбір азаматтың пікірі өңірдің дамуы үшін маңызды», – деп түйіндеді.
