ШЫМКЕНТКЕ КЕЛУШІ ҚОНАҚТАР САНЫ АРТТЫ
Шымкентте қала күні қарсаңында әуе рейстері мен пойыз қатынастарында сатылым билеттерінің саны азайған. Әсіресе, апта соңына қарай, «Шымкент қаласы күнімен» тұспа-тұс келген демалыс күндеріне алдын ала брондау арқылы сатылып жатқан билеттер саны таусылуға шақ. Шымкент әуежайы арқылы қалаға осы апта ішінде 119 рейспен 22 мыңға жуық адам келмек. Одан өзге, Шымкент теміржол вокзалы арқылы шамамен 170-ке жуық пойыз қатынасының жүруі жоспарланған. Орташа есеппен, пойызбен Шымкентке 40 мыңнан аса адам саяхат жасамақ.
Осы күндері әуежайдағы тұрақты рейстер бойынша еліміздің Нұр-Сұлтан, Алматы, Ақтау, Атырау, Семей, Қостанай және шетелдің Анталия, Кутаиси, Стамбұл, Мәскеу және өзге де қалаларынан келушілер бар. Ал чартерлік рейстер қатарында Ақтөбе, Жезқазған, Павлодар, Петропавл, Тараз, Қызылорда және Қарағанды қалаларына әуе рейстері қатынауда. Сондай-ақ, жыл басынан бері халықаралық бағытта Анталия, Шарм-эль-Шейх, Дубай, Мәскеу, Бішкек, Ош, Медина, Гоа, Шарджа және т.б қалалармен чартерлік әуе рейстері қатынап келеді.
Ресми статистикаға сүйенсек, осы жылдың 3 айында Шымкентке 97 501 адам келіп, Алматы мен Нұр-Сұлтан қаласынан кейінгі үшінші орынға ие болған. Айта өтсек, Шымкентте қала күні мерекесіне орай жиырмаға жуық іс-шара ұйымдастырылған.
Соңғы уақытта Шымкент қаласына келетін қонақтар санында өсім байқалады. Еліміздің өзге өңірлерінен келетін қонақтарды былай қойғанда шетелден келіп, үшінші мегаполисті тамашалайтындар саны да көбейіп келе жатыр. Бұдан бөлек, қала аумағында орналасқан тарихи-мәдени орындарды жаңғырту ісі де ерекше назарға алынып, тиісті шаралар көріліп келе жатыр. Қонақжайлығымен танылған қаламызда туристерді өзіне тартатын объектілер саны да арта түсуде. Мұның өзі қаланың туризм орталығына айналуына сеп болуда.
