ҚАЛА КӨРКІНЕ КӨРІК ҚОСАТЫН ҒИМАРАТТА ҚҰРЫЛЫС ҚАРҚЫН АЛҒАН
Шымкент қаласында мәдениет саласына айрықша назар аударылып келе жатыр. Күні бүгінге дейін үшінші мегаполисте республикалық деңгейдегі түрлі шаралар ұйымдастырылды. Бұдан бөлек, мәдениет нысандарының да инфрақұрылымы жақсарып келе жатыр. Мәселен, қазіргі уақытта халықаралық стандартқа сай конгресс-холдың құрылысы қарқынды жүргізілуде.
2021 жылы басталған ғимарат құрылысы барша заман талаптарына сай жүргізілуде. Жер көлемі 5 гектардан асса, құрылыс ауданы – 16 мың м2 шамасында. Жұмыс барысын арнайы барып көрген қала әкімі Мұрат Әйтенов құрылыс басқармасы мен жауапты мердігер мекеме өкілдеріне басты назарды сапаға беру керектігін ескертті. Мәдениет нысаны алдағы уақытта жергілікті және республикалық маңызы бар қоғамдық іс- шараларды, конференцияларды, фестивальдерді, концерттік қойылымдарды өткізуге арналған көпфункционалды орталық болмақ. Ғимарат 3 қабаттан, 5 блоктан тұрады. 2066 орынға лайықталған көрермен залы, 190 орындық конференц залы, 80 орындық салтанат залы, 40 орындық пресс кабинет, асхана және көлікке жер асты тұрағы қарастылырған. Жалпы Шымкент қаласында құрылыс саласы қарқын алған. Қалада көпқабатты тұрғын үйлер көптеп салынуда. Олардың сапасы да қатаң бақылауда екенін айрықша айта кету керек. Мәселен, жуырда ғана шаһар басшысы Мұрат Әйтенов инженерлік инфрақұрылым құрылысы жүріп жатқан «Igilik Park» тұрғын үй кешеніне барып, жұмыс барысымен танысты. Қазіргі таңда 12 000 шаршы метрлік 200 пәтерден тұратын 4 тұрғын үйге кәріз жүйесі мен су құбыры 95%-ға тартылып, электр желісі жүргізілуде. «Халықтың сұранысы сапалы су, жарық және кәріз жүйелері. Бір рет жасалған жүйе ұзақ жылдар қызмет етуі керек. Сондықтан да сапаға аса мән беру керек» деді қала әкімі тиісті сала өкілдерімен кездесу барысында. «Igilik Park» кешеніндегі пәтерлерді «Өз үйім» бағдарламасы арқылы алуға болады. Өтініш беру Банктің otbasybank.kz интернет-ресурсында жүзеге асырылуда. Қорыта айтқанда, үшінші мегаполистегі құрылыс сапасы қашан да бақылауда. Орын алған кемшіліктер бойынша дер кезінде тапсырмалар беріліп, олқылықтардың орны толтырылып келеді.
