ШЫМКЕНТТІҢ ТУРИСТІК ӘЛЕУЕТІ АРТЫП КЕЛЕДІ
Соңғы уақытта Шымкент қаласына келуші туристер саны артқан. Өз кезегінде, үшінші мегаполистің мүмкіндіктері халықаралық деңгейде өтетін түрлі шараларда таныстырылып келеді. Мәселен, биылдың өзінде бірнеше мемлекетте өткен халықаралық шарада Шымкенттің туристің әлеуеті таныстырылды. Бүгінгі материалымызда солардың бірі турасында тарқата жазуды жөн санап отырмыз.
Биыл Бакуде “Шымкент қаласының күндері” өтті. Оны Шымкент қаласы Туризм және сыртқы байланыстар басқармасы ұйымдастырса, Қазақстанның Әзірбайжандағы Елшілігі қолдады. Биыл Қазақстан Республикасы мен Әзірбайжан Республикасы арасында дипломатиялық қарым-қатынастың орнағанына 30 жыл. Айтулы датаға орай Әзірбайжан елінің астанасы Баку қаласында «Welcome to Kazakhstan» атты еліміздің өңірлерінің қатысуымен туристік-мәдени күндер өткен болатын. Осы мақсатта бір аптаға жоспарланған “Шымкент қаласының күндері” аясында Оңтүстік өңірдің қонақжайлылығын, гастрономиялық тағамдарын, мәдениеті мен салт-дәстүрін кеңінен таныту жоспарланып, жүзеге асырылды. Шымкент делегациясының құрамына Шымкент қаласы әкімінің орынбасары Айбек Саттыбаев, Туризм және сыртқы байланыстар басқармасының басшысы Ерлан Қыдыров, қалалық мәслихаттың хатшысы Бахадыр Нарымбетов бастаған депутаттар кірді. Ерлан Қыдыров екі елдің тарихи-мәдени құндылықтарының ұқсастықтарын сөз етіп, өткен айда ұйымдастырылған Туристік ақпараттық орталықтардың I слетінде Әзірбайжан елі оң көзқарас танытып, белсенді қатысқанын айтып өтті. Жалпы, келушілер тек қаланың туристік әлеуетін танып қана қоймай, “Сандық” ресторанының ұлттық тағамдарын, Майра Мұхамедқызының опералық әндерін және Бағжан Октябрьдің виолончельмен тартқан әуендерін тыңдап, “Visit Shymkent” туристік ақпараттық орталығы ұсынған VR-көзілдірік арқылы виртуалды Шымкентке көз жүгіртті. Іс-шара мақсаты — қаланың ерекше тұстарын көрсету арқылы Әзірбайжан тұрғындарын Шымкент қаласының туризмін дамытуға шақырып, жалпы туристер легін арттыру. Игі бастаманың жемісін алдағы уақытта нақты көретін боламыз. Әзірге қонақжайлығымен танымал үшінші мегаполистің кескін-келбеті қарт Кавказдағы ағайынға ұнаған тәрізді.
