БАЛАЛАРДЫҢ ТЕРЕЗЕДЕН ҚҰЛАУЫ: ҚАЙҒЫЛЫ ЖАҒДАЙ БОЛМАС ҮШІН НЕ ІСТЕУ КЕРЕК?

Қалада балалардың жарақат алуы мен өліміне әкеліп соғатын негізгі себептердің бірі — терезеден құлау оқиғасы. Көп жағдайда 2 жастан 7 жасқа дейінгі балалар терезеден құлау қауіп-қатеріне жиі ұшырайды. Себебі бұл жастағы балалар терезе алдында ойнаудың қаншалықты қауіпті екенін түсіне бермейді.
Көп жағдайда балалардың құлауы олардың ата-анасының қарауынсыз қалуы себебінен орын алады. Оқыс жағдайды алдын алу үшін, құтқарушылар кішкентай балаларды жалғыз қалдырмауға кеңес береді. Сонымен бірге барлық жиһаздарды бала терезе алдына шыға алмайтындай етіп, терезе жанынан алшақ қоюды ескертеді.
Маңызды ақпарат!

Терезедегі москиттік торларға сенбеу керек. Олар құлаудан сақтауға арналмаған. Керісінше, москиттік тор қайғылы жағдайдың орын алуына әкеліп соғады. Балалар москиттік торларды қауіпсіз деп ойлайды және терезеге сүйенгендей сол торларға сүйенеді. Ең сапалы тордың өзі баланың салмағы мен қысымын көтере алмайды.
Егер балаңыз бөлмеде болса, терезені және балкон есігін ашпаңыз. Жоғарғы желдеткіштерді немесе тік желдету режимін пайдаланыңыз. Бала терезені өз еркімен аша алмау үшін терезеге арнайы бекіткіштер орнату қажет.
Егер сіз балаңызға терезеден бір нәрсе көрсететін болсаңыз, оны мықтап ұстау қажеттігін естен шығармаңыз. Баланың шалт қимылдарына дайын болыңыз. Алақанды құрғақ ұстаңыз, баланы киімнен ұстамаңыз. Балаларға қауіпсіздік сабақтарын үйретіңіз. Балалардың үлкендерін өзінен кішілеріне қарауға үйретіңіз.

Д.Әбді,

Түркістан қаласы Төтенше

жағдайлар басқармасының  инженері, 

       азаматтық қорғау лейтенанты.