ЫНТЫМАҚТАСТЫҚ ЖҰМЫСТЫ ЖЕМІСТІ ЕТПЕК
Шымкенттегі «Достық» үйінде Қазақстан халқы Ассамблеясы мен «Ауыл» халықтық-демократиялық патриоттық партиясы, Жалпыұлттық социал-демократиялық партиясы, Қазақстан Халық партиясы, «Ақ жол» демократиялық партиясы, «Байтақ» жасылдар партиясы», «Respublika» партиясы филиалдары бірлескен меморандумға қол қойды.
Енді қалалық Ассамблея мен қаладағы саяси партиялар құжатқа сай ақпарат алмасу, жалпыұлттық бірлікті нығайтуға бағытталған ақпараттық-насихаттық жұмыстарды жүргізу, халықтың құқықтық мәдениетін арттыру және бірлік құндылықтарын ілгерілету бойынша диалог алаңдарын ұйымдастыру бағытында бірге жұмыс атқарады. Бұған дейін Қазақстан халықтары ассамблеясымен «AMANAT» партиясының қалалық филиалы ассамблеяның саяси партиялармен және мемлекеттік органдармен өзара қарым-қатынасын күшейту туралы Мемлекет басшысы Қасым-Жомарт Тоқаевтың Қазақстан халқы Ассамблеясының ХХХІІ сессиясында берген тапсырмасы аясында бірлескен меморандум түзген болатын. «Достық» үйінде өткен жиынға қалалық партия белсенділері мен ассамблея мүшелері қатысты. «AMANAT» партиясы Шымкент қалалық филиалының төрағасы Б.Нарымбетов пен қалалық «Қоғамдық келісім» мекемесінің басшысы Е.Байқонақов Президенттің ассамблеяның саяси партиялармен және мемлекеттік органдармен өзара қарым-қатынасын күшейту туралы міндеті аясында нәтижелі жұмыс жүргізілетінін жеткізді. Жиында сөз алған Б.Нарымбетов «Мемлекет басшысы: «Этносаралық келісім саясатында сөз бен іс бір жерден шығуға тиіс. Ассамблея саяси партиялармен ақылдасып, кеңесіп отыруы қажет. Сонда бірлігімізді нығайтамыз. Этносаралық қатынасқа қатысты кез келген арандатудың жолын кесеміз» деді. Осы бағытта біз ассамблеямен бірлесіп жұмыс жүргіземіз» деп атап өткен болатын.
