ЕСІРТКІГЕ ҚАРСЫ КҮРЕС ЕЛ ЕРТЕҢІ ҮШІН ҚАЖЕТ
Нашақорлықтың кеселі қоғамға өзінің кесірін аз тигізбей тұр. Саналы ұрпақтың миын улап, әлеуметтік желілер арқылы зиянды заттарды тықпалайтындар да аз емес. Десе де, қоғам мен ел болып, бұл індетке қарсы тұру парызымыз.
Президент Қасым-Жомарт Тоқаев «Халық бірлігі және жүйелі реформалар – ел өркендеуінің берік негізі» атты Жолдауында осы мәселе туралы: «Өскелең ұрпақтың болашағына қауіп төндіретін тағы бір қатер – есірткі заттарының, соның ішінде синтетикалық есірткінің де таралуы. Құқық қорғау органдарына бұл қатердің азаматтар арасында, әсіресе жастардың ішінде таралуына барынша тосқауыл қоюды тапсырамын», деген еді. Осыған орай, Шымкенттік жастар, қалалық Полиция департаменті Есірткі қылмысына қарсы іс-қимыл басқармасымен білесе отырып, қаладағы адамдар көп шоңырланатын орында профилактикалық шаралар өткізуде. Мәселен, шахардағы сауда нүктелерінде болып, есірткі заттарын насихаттау мен жарнамалаудың алдын алу бойынша түсіндірме жұмыстарын жүргізді. Сонымен қатар, Түркістан және А.Байтұрсынов көшелері бойында адамның сезімі мен түйсіктеріне бейсаналық түрде әсер ететін, есірткі заттарына қызығушылығын қалыптастыратын немесе оларды қолдайтын бейнелер мен жазулары бар заттарды сатуға тыйым салынғанын ескертіп, жадынамалық парақшалар таратты. Еске сала кетейік, есірткі заттары бейнеленген киім-кешектерді, тұрмыстық бұйымдарды сатқаны үшін кез-келген азамат заң аясында жауапкершілікке тартылады. Жалпы үшінші мегаполисте 14-35 жас аралығында 362 мыңнан астам жас бар. Бұл қала тұрғындарының 32%-ын құрайды. Айта кету керек, жуырда Жастар ресурстық орталығының ұйымдастыруымен жас аналар арасында «Оң көзқарас өмірді өзгертеді» тақырыбында семинар-тренинг өтті. Семинарды пихологиялық әдістемелер бойынша адамның жан-жарасын емдейтін коуч, тренер Ботакөз Дүйсенбаева жүргізді. Ол жас аналарға өзін-өзі бағалау, қадір-қасиетін арттыру, өзіне деген сенімділігін нығайту бойынша түрлі кеңестер мен бөлісті.
