«ТАЗА ҚАЛА» ЖАЛПЫ ҚАЛАЛЫҚ АКЦИЯСЫ ӨТТІ
Шымкент қаласында дәстүрлі түрде өткізіліп келе жатқан «Таза қала» акциясы биыл да өз жалғасын тапты. Бұл бастама мегаполистің санитарлық жағдайын жақсартуға, экологиялық мәдениетті қалыптастыруға және тұрғындар үшін қолайлы орта жасауға бағытталған. Қаладағы төрт ауданның барлығында ұйымдастырылған шараға жергілікті билік өкілдері, коммуналдық мекемелердің қызметкерлері, еріктілер мен қала тұрғындары белсене қатысты.
Әл-Фараби ауданында акция аясында 335 адам мен 22 арнайы техника жұмылдырылды. Нәтижесінде 27 тонна қоқыс шығарылды. Қоғамдық орындарды ретке келтірумен қатар, қураған ағаштар кесіліп, бұталар шабылды, жолдар мен аяқжолдар тазаланды. Сондай-ақ қоқыс алаңшалары жуылып, тұрғындарға қолайлы жағдай жасауға мән берілді. Тұран ауданындағы шараға 426 адам мен 36 техника тартылып, 18,3 тонна қоқыс шығарылды. Бұл ауданда жасыл желектерді күтіп-баптау, ағаш-бұталарды кесу және аумақтарды тұрмыстық қалдықтан тазалау жұмыстары жүйелі жүргізілді. Қаладағы жаңа құрылыс аймақтарының көбеюімен бірге мұнда санитарлық тазалықты сақтау ерекше маңызға ие. Абай ауданында тазалық жұмыстарына 400 адам мен 15 техника жұмылдырылып, ең көп көлемде – 42 тонна қоқыс шығарылды. Бұл көрсеткіш ауданның аумағы кең әрі тұрғындар тығыз орналасқанын көрсетеді. Акция барысында жасыл аймақтарға күтім жасалып, қураған ағаштар алынып, шөп шабу жұмыстары жүргізілді. Жалпы алғанда, тазалық шарасының барысында әрбір ауданның аумағында жасыл желектерді күтіп-баптау, жолдар мен аяқжолдарды жуу, қоқыс алаңшаларын ретке келтіру сынды жұмыстар атқарылды. Бұл тек санитарлық шара ғана емес, қала тұрғындарының экологиялық мәдениетін арттыруға бағытталған маңызды бастама болды.
«Таза қала» акциясының мәні қоқыс жинаумен шектелмейді. Ол қоғамның әрбір мүшесін қоршаған ортаға жауапкершілікпен қарауға шақырады. Қала тазалығы тек коммуналдық қызметтердің ғана емес, әрбір тұрғынның күнделікті өмір салтына айналуы тиіс. Экологиялық мәдениетті қалыптастырудың басты тетігі – тұрғындардың өз ортағына деген қамқор көзқарасы. Шымкент – еліміздің үшінші мегаполисі, демек оның келбеті мен санитарлық жағдайы бүкіл өңірдің әлеуметтік бейнесін көрсетеді. Қала халқы жыл сайын артып отырғандықтан, экология мен тазалық мәселесі күн тәртібінен түспейді. Мұндай акциялар тұрғындардың табиғатты қорғауға деген жауапкершілігін арттырып, жастарды еріктілікке баулиды. Қорытындылай айтқанда, «Таза қала» жалпы қалалық акциясы – Шымкенттің ажарын ашып қана қоймай, тұрғындар санасына экологиялық мәдениетті сіңіруге арналған маңызды шара. Қала билігі мен халықтың бірлескен еңбегі арқылы мегаполистің санитарлық жағдайы жақсарып, тұрғындардың өмір сүру сапасы арта түспек.
