ШЫМКЕНТТЕ СПОРТТЫҚ АТУДАН XVI АЗИЯ ЧЕМПИОНАТЫ БАСТАЛДЫ
Шымкент қаласы тамыз айында әлемдік деңгейдегі спорттық додаға куә болып отыр. «Shymkent Shooting Plaza» базасында өтіп жатқан халықаралық чемпионатқа 27 елден 800-ге жуық спортшы қатысуда. Мұндай көлемдегі жарыстың елімізде ұйымдастырылуы – Қазақстанның спорттағы беделінің артып келе жатқанының айқын дәлелі.
Ашылу салтанатына еліміздің бірқатар маңызды тұлғаларымен қатар, шетелдік мәртебелі қонақтардың қатысуы турнирдің маңызын еселей түсті. Шымкент қаласының әкімі Ғабит Сыздықбековпен бірге ҚР Бас Прокуроры әрі Қазақстан спорттық ату федерациясының президенті Берік Асылов, ҚР Ғылым және жоғары білім министрі Саясат Нұрбек, Туризм және спорт министрлігі өкілдері жарыстың ресми ашылу рәсімінде сөз сөйлеп, спортшыларға сәттілік тіледі. Ал Халықаралық спорттық ату федерациясының президенті Лучано Росси мен Азия ату конфедерациясының жетекшісі шейх Салман Сабах әл-Салем ас-Сабахтың келуі бұл чемпионаттың жаһандық деңгейдегі салмағын көрсетеді. Чемпионат бағдарламасы да ерекше ауқымды. «Тапанша», «мылтық», «қозғалмалы нысана», «стендтік ату», «трап», «скит» және «скит-микс» сынды бағыттар бойынша тартысты сындар өтуде. Әлемдік спортшылардың бәсекесінде 700-ден астам медаль сарапқа салынады. Ең бастысы, бұл турнир олимпиадалық екі спорт түрін – нысана көздеу мен стенд ату сайыстарын қамтып отыр. Яғни, жарыс жеңімпаздары халықаралық рейтингке ықпал ететін ұпай жинап, алдағы Олимпиадаға дайындықтарын шыңдайды.
Мұндай дода тек спортшылардың шеберлігін арттырып қана қоймайды. Ол бапкерлердің тәжірибе алмасуына, төрешілердің кәсіби біліктілігін жетілдіруге жол ашады. Әсіресе, Қазақстан үшін спорттық ату секілді техникалық әрі табандылықты қажет ететін бағыттарды дамыту маңызды. Өйткені еліміз халықаралық аренада ат спорты, бокс, күрес секілді дәстүрлі салалармен қатар, жаңа бағыттарда да өзін көрсетуге талпынып келеді. Чемпионаттың Шымкент қаласында өткізілуі де айрықша мәнге ие. Соңғы жылдары мегаполис спорт инфрақұрылымын дамытуға баса көңіл бөліп отыр. Жаңа спорттық нысандар, оқу-жаттығу базалары салынып, жас ұрпақтың спортпен айналысуына жағдай жасалуда. «Shymkent Shooting Plaza» кешені – соның жарқын мысалы. Мұнда халықаралық стандарттарға сай ату алаңдары салынып, әлем чемпионаты деңгейіндегі іс-шара өткізуге толық мүмкіндік жасалған. Халықаралық ауқымды жарыстардың Қазақстанда жиі өткізілуі ел имиджін көтеріп қана қоймай, спорт туризмін дамытуға да жол ашады. Әлемнің түкпір-түкпірінен келген спортшылар мен қонақтар еліміздің мәдениетімен, тарихымен танысып, Қазақстанды жаңа қырынан көреді. Бұл өз кезегінде экономикалық пайда әкелумен қатар, жас ұрпаққа патриоттық рух пен спортқа қызығушылық сыйлайды. Қорытындылай келе, Шымкенттегі халықаралық чемпионат – Қазақстан спортының дамуындағы жаңа белес. Бұл жарыс еліміздегі спорттық ату саласының әлеуетін көтеріп қана қоймай, Қазақстанды әлемдік спорт картасында тағы бір мәрте танытты. Алдағы уақытта осындай деңгейдегі додалардың жиі өткізілуі отандық спортшыларға тәжірибе жинап, үлкен жетістіктерге жетуге жол ашатыны анық.
