ЖАЙЛЫ МЕКТЕПТІҢ ЖАЙ-КҮЙІ ПАРТИЯ БАҚЫЛАУЫНДА
Білім беру жүйесін жаңғыртуда жаңа үлгідегі жайлы мектептердің салынуы – еліміздің стратегиялық басымдықтарының бірі. Бұл жоба тек оқушылардың сапалы білім алуына жағдай жасау үшін ғана емес, сонымен қатар әлеуметтік әділеттілікті қамтамасыз етуге бағытталған. Жаңа мектептер балалардың қолайлы ортада оқып, шығармашылықпен айналысуына, қауіпсіз әрі заманауи инфрақұрылымда дамуына мүмкіндік береді. Дегенмен кез келген ірі жобаның сапалы жүзеге асырылуы үшін тұрақты бақылау мен жауапкершілік қажет.
Осы тұрғыда «AMANAT» партиясы Қаратау аудандық филиалының ұйымдастыруымен өткен партиялық бақылау іс-шарасы айрықша маңызға ие болды. Мәслихат депутаты, фракция мүшесі Лазиз Сулайманов, аудандық филиалдың атқарушы хатшысы Данияр Омаров, Партиялық бақылау комиссиясының төрағасы Марат Сейітов және комиссия мүшелері Таскен тұрғын алабында орналасқан №151 жайлы мектептің құрылыс алаңында болып, жұмыстың барысымен танысты. Аталған мектептің құрылысы 2024 жылы басталған болатын. Бүгінде нысанның 98 пайызы дайын. Бұл мердігердің жұмысты жүйелі жүргізгенін көрсетеді. Алайда тек сандық көрсеткішке сүйеніп қана қою жеткіліксіз. Құрылыстың сапасы, қауіпсіздік талаптарының орындалуы және нысанның дер кезінде пайдалануға берілуі – ең негізгі мәселе. Осы себепті бақылау барысында бірқатар кемшіліктер анықталды. Мәслихат депутаты Лазиз Сулайманов құрылыс сапасына назар аударып, жауапты мердігер компания – «Ақ Ордасы корпорациясы» ЖШС өкіліне нақты ескертулер жасады. Депутаттың айтуынша, оқу жылы басталуына санаулы күндер ғана қалды. Бұл жағдайда тек қана сапаға емес, уақытылы тапсыруға да басымдық берілуі тиіс. Ол үшін жұмысшылардың санын арттыру қажеттілігі айтылды. Себебі жеткілікті мамандар жұмылдырылмай, мерзімнің қысқа уақытында ауқымды жұмысты толық әрі сапалы аяқтау мүмкін емес. Бүгінде құрылыс жұмыстары қанағаттанарлық деп бағаланғанымен, кездесуде көтерілген мәселелер назардан тыс қалмайды. Партиялық бақылау комиссиясы бұл нысанды тұрақты қадағалап, анықталған кемшіліктердің дер кезінде түзетілуін қадағалайды. Бұл – қоғамның сенімін арттыратын және халық алдындағы жауапкершілікті айқындайтын нақты әрекет.
Жайлы мектептің дер кезінде әрі сапалы салынуы – ең алдымен балалардың мүддесі үшін қажет. Білім беру процесі тоқтаусыз әрі қолайлы жағдайда жүруі тиіс. Сондықтан да «AMANAT» партиясының бұл бағыттағы бақылау жұмысы – стратегиялық міндеттің орындалуына жасалған нақты үлес. Қорытындылай келгенде, №151 мектеп құрылысына жүргізілген бақылау шарасы – жай ғана тексеріс емес, халық сенімін ақтау жолындағы жауапты қадам. Қала тұрғындары үшін жаңа мектептің сапалы салынып, дер кезінде пайдалануға берілуі – маңызды мәселе. Ал партиялық бақылаудың пәрменділігі осы істің уақытында әрі талапқа сай аяқталуына кепіл болмақ.
