ӘЛЕУМЕТТІК САЛА ЖҰМЫСШЫЛАРЫНА СЫЙАҚЫЛАР МЕН КӘСІПОДАҚ НАГРАДАЛАРЫ ТАБЫСТАЛДЫ
Шымкент қаласында Қазақстан Республикасының Конституция күніне орайластырылған игі іс-шаралардың бірі қалалық жұмыспен қамту және әлеуметтік қорғау басқармасының «№6 балалар арнаулы әлеуметтік қызметтер көрсету орталығы» коммуналдық мемлекеттік мекемесінде өтті. Бұл мерекелік жиынға «Қызмет» салалық кәсіподағы Шымкент қалалық филиалының төрағасы Серік Елемесұлы Әуесханов арнайы қатысып, мекеме ұжымымен кездесті.
Салтанатты басқосу орталықтың басшысы Серік Сейілұлы Бабақұловтың қатысуымен өтті. Жиында Конституция күнінің ел өміріндегі орны мен маңызы айтылып, қызметкерлердің адал еңбегі жоғары бағаланды. Кәсіподақ төрағасы ұжым мүшелерін мерекемен құттықтап, олардың кәсіби қызметін ел игілігіне қосқан зор үлес деп атап өтті. Іс-шара барысында бірқатар қызметкерлер кәсіподақтың және мекеме басшылығының марапаттарына ие болды. Әлеуметтік жұмыс жөніндегі маман Рабиға Рахматұллақызы Оспанова мен тәрбиеші Мейрамкүл Жакыпбекқызы Қаратаева «Еңбек озаты» төсбелгісімен марапатталды. Бұл награда – еңбекқорлық пен кәсібиліктің айқын белгісі болып табылады. Сондай-ақ дефектолог-мұғалім Несібелі Нұржанқызы Алтымбекова мен мейіргер Нұрзилахан Ниязбекқызы Байбатшаева «Құрмет грамоталарына» ие болды. Олардың бала тәрбиесіне және денсаулық сақтау саласына қосқан үлесі, кәсібіне деген жауапкершілігі ерекше атап өтілді. Палата санитары Меруерт Маханқызы Есімханова мен жұмысшы Серік Әбілдашұлы Усмағамбетов болса «Алғыс хаттармен» марапатталды. Бұл марапат олардың күнделікті еңбегінің қоғам үшін маңыздылығын көрсетіп, ұжымдағы ынта-жігерін арттыра түсті. Сонымен бірге зейнеткерлік жасқа жеткен қызметкерлер де назардан тыс қалмады. Оларға бастауыш кәсіподақ ұйымының атынан қаржылай сыйақылар табысталып, мекеме басшысының арнайы Алғыс хаттары берілді. Бұл қадам ұзақ жылдар бойы адал еңбек еткен азаматтарға көрсетілген үлкен құрметтің көрінісі болды.
Мерекелік кездесу жылы шырайда өтіп, ұжым мүшелері өздерін кәсіподақ тарапынан әрдайым қолдау мен қамқорлық сезінетінін атап өтті. Конституция күніне арналған мұндай шаралар қызметкерлердің еңбекке деген ынтасын арттырып қана қоймай, әлеуметтік әділеттілік пен бірлікті дәріптеуге үлес қосатыны сөзсіз. Осылайша, «№6 балалар арнаулы әлеуметтік қызметтер көрсету орталығында» өткен кездесу еңбек адамын құрметтеудің, ұжымдағы ауызбіршілікті арттырудың және қоғам алдындағы жауапкершілікті сезінудің айқын үлгісіне айналды.
