АЗАМАТТАРҒА ЗАҢГЕРЛІК КӨМЕК КӨРСЕТІЛДІ
«AMANAT» партиясының Шымкент қалалық филиалында азаматтарға нақты көмек көрсетуге бағытталған маңызды шара өтті. «Құқықтық көмек» партиялық жобасы аясында ұйымдастырылған қабылдауға түрлі сала мамандары қатысып, тұрғындарға тегін құқықтық кеңес берді. Бұл бастама қоғамда құқықтық мәдениетті қалыптастыру, азаматтардың заң аясындағы сауаттылығын арттыру және өз құқықтарын қорғауға үйрету мақсатында жүзеге асырылып келеді.
Қабылдауға «Zangerler Palatasi» заң консультанты Зульфия Рахимбаева, тәжірибелі адвокат Гүлжанат Құттыбек, Әділет департаментінің бас маманы Толғанай Ғалымжанқызы және сот орындаушы Ғазиз Айтбаев қатысты. Әр маман өз бағыты бойынша азаматтардың өтініштерін мұқият тыңдап, нақты түсіндірмелер мен ұсыныстар берді. Тұрғындар тарапынан көтерілген мәселелердің басым бөлігі алимент өндіру, несиелік қарыздар, тұрғын үй және жер қатынастарына байланысты болды. Қабылдау кезінде азаматтар өздерінің өмірлік маңызы бар сұрақтарын ашық қойып, кәсіби мамандардан нақты жауап алды. Кейбір азаматтар отбасылық даулар мен сот шешімдерінің орындалуына қатысты мәселелерді қозғады. Мамандар мұндай жағдайларда заңмен қарастырылған тетіктер мен рәсімдерді түсіндіріп, қай органға жүгіну керектігін нақтылап берді. Әсіресе, алимент өндіру және борышкерлермен жұмыс істеу бағытында нақты мысалдар келтіріліп, азаматтардың құқықтарын қорғаудың тиімді жолдары көрсетілді. Әділет департаментінің өкілі Толғанай Ғалымжанқызы жер қатынастары мен мүлік рәсімдеу мәселелеріне тоқталып, азаматтардың құжаттарын заңға сәйкес рәсімдеудің маңызын түсіндірді. Ал адвокат Гүлжанат Құттыбек несиелік қарыздар мен банктік даулар бойынша құқықтық кеңес беріп, тұрғындарға борыштық жүктемені реттеу механизмдері туралы кеңінен айтып берді. Сот орындаушы Ғазиз Айтбаев атқарушылық істердің орындалу барысын түсіндіріп, борышкерлер мен сот шешімін орындау тәртібі жөнінде нақты мысалдар келтірді. Қабылдау барысында азаматтардың әрқайсысына заң нормаларына сай түсіндірме беріліп, тиісті құжаттарды рәсімдеу және шағым жолдау тәртібі түсіндірілді. Кейбір өтініштер бойынша мамандар тиісті мекемелерге бағыттама жазып, арызданушылардың мәселесін бақылауға алатынын жеткізді. Бұл тәсіл тұрғындардың мәселелерін тек қағаз жүзінде емес, нақты шешуге бағытталғанын көрсетеді.
«AMANAT» партиясы қолға алған «Құқықтық көмек» жобасы – әлеуметтік әділдік пен азаматтардың құқықтарын қорғауға бағытталған ауқымды бастамалардың бірі. Жоба аясында партия филиалдарында тұрақты түрде қабылдаулар өткізіліп, әр түрлі санаттағы азаматтарға тегін заңгерлік кеңес беріледі. Мұндай іс-шаралар, әсіресе, әлеуметтік тұрғыдан әлсіз топтар – көпбалалы аналар, зейнеткерлер, мүмкіндігі шектеулі азаматтар мен жұмыссыз жандар үшін айрықша маңызға ие. Партия өкілдерінің айтуынша, мұндай қабылдаулар қоғамда құқықтық мәдениетті арттыруға және азаматтардың заң алдындағы жауапкершілігін күшейтуге сеп болады. Тұрғындар көп жағдайда өз құқықтарын толық білмегендіктен, қиын жағдайға тап болатыны жасырын емес. Ал кәсіби мамандармен бетпе-бет кездесіп, заң шеңберінде кеңес алу олардың өмірінде үлкен оң өзгерістерге жол ашады. Қабылдауға келген тұрғындар шараның жоғары деңгейде ұйымдастырылғанын атап өтіп, алғыстарын білдірді. Олардың айтуынша, осындай тегін кеңестер көптеген азаматтарға өз мәселесін шешуде нақты бағыт береді. Әсіресе, несиелік даулар мен тұрғын үйге қатысты құқықтық түсіндірмелер көпшіліктің қызығушылығын тудырды. «AMANAT» партиясының Шымкент қалалық филиалы алдағы уақытта да «Құқықтық көмек» жобасын жалғастырып, құқықтық кеңестерді қаланың түрлі аудандарында өткізуді жоспарлап отыр. Бұл бастама аясында тұрғындарға тек кеңес беру ғана емес, сонымен қатар даулы жағдайларды заңды шешу үшін қажетті құжаттарды әзірлеу, тиісті инстанцияларға жолдау және олардың орындалуын бақылау жұмыстары да жүргізіледі.
