ҚАЛА ӘКІМІНІҢ ОРЫНБАСАРЫ АЗАМАТТАРДЫ ЖЕКЕ ҚАБЫЛДАДЫ
«AMANAT» партиясының Шымкент қалалық филиалында «Құқықтық көмек» жобасы аясында қала әкімінің орынбасары Арман Сәбитов тұрғындарды жеке қабылдау өткізді. Бұл іс-шара партияның азаматтармен тығыз қарым-қатынас орнатып, олардың өтініштері мен әлеуметтік мәселелерін шешуге бағытталған жүйелі жұмысының бір бөлігі болып табылады. Қабылдауға партия филиалының Атқарушы хатшысы Ербол Байқонысов, сондай-ақ денсаулық сақтау, әлеуметтік қорғау және тұрғын үй салаларына жауапты басқармалардың басшылары мен мамандары қатысты.
Қоғамдық қабылдаудың басты мақсаты – тұрғындардың күнделікті өмірде кездесетін әлеуметтік, тұрмыстық және құқықтық мәселелерін тыңдап, нақты шешу жолдарын анықтау. Кездесуге келген азаматтар денсаулық сақтау саласындағы қызмет сапасын арттыру, әлеуметтік қолдау көрсету, мүгедектік тобына шығу рәсімдері, атаулы әлеуметтік көмек (АӘК) алу және тұрмыс жағдайын жақсарту секілді мәселелерді көтерді. Қабылдау барысында әрбір өтініш жеке қаралды. Тұрғындардың сұрақтарына жауапты мамандар түсіндірме беріп, нақты бағыт-бағдар ұсынды. Бірқатар мәселелер сол жерде шешімін тапты. Мысалы, АӘК рәсімдеу бойынша құжат тапсыру мерзімі мен шарттары түсіндіріліп, кейбір азаматтарға қажетті кеңес пен көмек көрсетілді. Ал күрделі мәселелер бақылауға алынып, тиісті мемлекеттік мекемелерге жолданды. Арман Сәбитов қабылдауға келген әр азаматтың мәселесіне бейжай қарамай, жауапты басқарма басшыларына нақты тапсырмалар берді. Әрбір сұрақтың орындалуы бақылауда болатынын, тұрғындардың өтініштері шешімсіз қалмайтынын атап өтті. Сонымен қатар, азаматтарға заң аясында әрекет ету, өз құқықтарын қорғау және әлеуметтік бағдарламаларға қатысу жолдары туралы толық ақпарат берілді. Қабылдау барысында денсаулық сақтау саласына қатысты мәселелер де кеңінен талқыланды. Кей тұрғындар медициналық қызмет сапасына, дәрі-дәрмекпен қамтамасыз етуге және мамандар тапшылығына қатысты өз ұсыныстарын жеткізді. Бұл сұрақтар бойынша да жауапты құрылымдарға тиісті тапсырмалар берілді.
Партия өкілдері мұндай кездесулердің қоғамдағы әлеуметтік әділеттілікті қамтамасыз етуге, азаматтардың билікке деген сенімін арттыруға сеп болатынын атап өтті. «AMANAT» партиясының қоғамдық қабылдаулары – халықтың талап-тілегін тікелей тыңдап, нақты шешім қабылдауға мүмкіндік беретін тиімді алаң. Мұнда әрбір азамат өз мәселесін ашық айтып, заңдық және әлеуметтік тұрғыда көмек ала алады. Партияның басты мақсаты – халықтың мүддесін қорғау, әлеуметтік әлсіз топтардың жағдайын жақсарту және әрбір тұрғынның лайықты өмір сүруіне жағдай жасау. Осы бағытта партия филиалдары жүйелі түрде қоғамдық қабылдаулар ұйымдастырып, нақты нәтижелерге қол жеткізуде. Арман Сәбитов қабылдау қорытындысында тұрғындарға сабыр мен сенім тілеп, барлық мәселенің кезең-кезеңімен шешілетінін айтты. Ол сондай-ақ, билік пен халық арасындағы ашық диалогты нығайту – қоғамның тұрақтылығы мен дамуының басты кепілі екенін ерекше атап өтті. «AMANAT» партиясының қоғамдық қабылдау бөлмелері бүгінде халықтың үні мен биліктің шешімін байланыстыратын маңызды көпірге айналды. Осындай кездесулер арқылы көптеген әлеуметтік түйткілдер шешімін тауып, азаматтардың өмір сапасын арттыруға нақты үлес қосылып келеді.
