ТЕРІСКЕЙЛІКТЕРДІҢ ТҮЙТКІЛДІ ТҮЙІНІ ШЕШІМІН ТАПТЫ
Қалалық өмір сапасын арттыру тек ірі инфрақұрылымдық жобалармен ғана емес, тұрғындардың күнделікті тұрмысын жеңілдететін ұсақ, бірақ маңызды істермен де өлшенеді. Осындай нақты нәтижелі жұмыстардың бірі ретінде Шымкент қаласының Теріскей шағын ауданындағы тұрғындардың өтінішінің орындалуын мысал етуге болады. Бұл жағдай – қоғам мен билік арасындағы тиімді байланыс пен азаматтық жауапкершіліктің айқын көрінісі.
Теріскей шағын ауданының тұрғыны «AMANAT» партиясының Әл-Фараби аудандық филиалының қоғамдық қабылдау бөлмесіне жүгініп, ауласындағы ескі орындықтардың тозығы жетіп, тұрғындарға қолайсыздық туғызып отырғанын жеткізді. Бұл өтініш партияның жергілікті деңгейдегі қоғамдық қабылдау жүйесінің қаншалықты тиімді жұмыс істеп тұрғанын көрсетті. Қарапайым тұрғыдан алғанда, ескі орындықтар мәселесі үлкен әлеуметтік проблема болып көрінбеуі мүмкін. Алайда, мұндай ұсақ-түйек деп саналатын мәселелер тұрғындардың өмір сүру сапасына, қалалық ортадағы жайлылық пен эстетикалық келбетке тікелей әсер етеді. Өтініш түскеннен кейін Әл-Фараби аудандық партия филиалының атқарушы хатшысы Ердаулет Жүнісбек мәселені назарға алып, тиісті аудан әкімдігіне ресми түрде жолдады. Бұл әрекет партияның азаматтардың пікіріне бейжай қарамай, олардың әрбір өтінісін нақты бақылауға алатынын дәлелдейді. Тұрғындардың өтінішіне жауап ретінде аудан әкімдігі тиісті мекемелерді жұмылдырып, ескі орындықтарды алып тастап, орнына жаңа, ыңғайлы және сапалы орындықтар орнатты. Жаңа орындықтардың орнатылуы тек материалдық өзгеріс емес, ол тұрғындардың өз ортасына деген көзқарасын өзгертетін әлеуметтік маңызы бар бастама болды. Аула келбеті жаңарып, тұрғындардың демалуы үшін қолайлы жағдай жасалды. Бұл – қаланың көркін арттырып қана қоймай, тұрғындардың өз үйлеріне, өз көшесіне деген қамқорлығын күшейтеді. Осындай шағын ауқымдағы, бірақ нақты нәтиже берген жұмыстар қоғамдағы сенімді қалыптастырады. Тұрғындардың өтінішіне партия мен әкімдік тарапынан жедел жауап қайтару – халықтың билікке деген сенімін арттырып, азаматтық белсенділікті ынталандырады. Мұндай тәжірибе партияның «Халықпен бірге!» ұранын нақты іспен дәлелдейтін мысал болып табылады.
Тұрғынның алғысы да осының дәлелі. Ол өз сөзінде «Біздің өтінішімізге жедел әрекет етіп, ауламызға жаңа орындықтар орнатып берген партияға және әкімдікке алғыс айтамыз. Бұл – тұрғындар үшін үлкен қолдау», – деп ризашылығын білдірді. Бұл алғыс – партияның қоғамдық қабылдауының тиімділігін, сондай-ақ әкімдік пен қоғам арасындағы байланыс арнасының дұрыс бағытта жұмыс істеп жатқанын көрсетеді. Мұндай бастамалардың жүйелі түрде жүзеге асуы қалалық мәдениеттің дамуымен қатар, тұрғындардың өз ортасына деген жауапкершілігін арттырады. Ауладағы орындықтар немесе жарық шамдарының орнатылуы секілді шағын істер де тұрғындардың өмір сүру деңгейін жақсартуға бағытталған маңызды әлеуметтік қадамдар.
