ХАЛЫҚ ҚАЛАУЛЫЛАРЫ ТҰРҒЫНДАРМЕН КЕЗДЕСТІ
Бүгінгі таңда еліміздің саяси өмірінде «AMANAT» партиясының рөлі айрықша. Партия тек сайлау науқандарында ғана емес, күнделікті қоғаммен тікелей жұмыс істей отырып, азаматтардың әлеуметтік жағдайын жақсартуға бағытталған нақты жобаларды жүзеге асыруда. Соның бір айғағы – Қаратау ауданында өткен кездесу. Бұл жиын «Халықпен бірге!» атты 2023–2027 жылдарға арналған Сайлауалды бағдарламаның орындалу барысын түсіндіру және тұрғындардың пікірін тыңдау мақсатында ұйымдастырылды.
Кездесуге мәслихат депутаттары Талғат Балтабаев пен Алия Юсупова, сондай-ақ «AMANAT» партиясы Қаратау аудандық филиалының атқарушы хатшысы Данияр Омаров қатысты. Бұл басқосу партия мен халық арасындағы ашық диалогтың нақты көрінісі болды. Депутаттар өз сөздерінде партияның қазіргі таңдағы басым бағыттарына, оның ішінде әлеуметтік қолдау, экономикалық тұрақтылық және инфрақұрылымдық даму мәселелеріне ерекше тоқталды. Талғат Дүйсебайұлының айтуынша, «AMANAT» партиясы өз бағдарламасын тек қағаз жүзінде емес, нақты іспен жүзеге асыруға мүдделі. Партия бастамасымен елді мекендерде жол жөндеу, ауызсу тарту, жаңа мектептер мен балабақшалар салу сияқты жобалар қолға алынған. Бұл бастамалардың барлығы тұрғындардың тұрмыс сапасын арттыруға бағытталған. Сонымен бірге ол кездесуде көтерілген мәселелердің назардан тыс қалмайтынын, әр өтініс бойынша нақты тапсырмалар берілетінін атап өтті. Мәслихат депутаты Алия Юсупова жиын барысында Мемлекет басшысы Қасым-Жомарт Тоқаевтың қыркүйек айындағы Жолдауының негізгі бағыттарын түсіндіріп өтті. Ол Жолдауда айтылған әлеуметтік саясаттың жаңғыруы, білім мен денсаулық сақтау салаларын дамыту, шағын және орта бизнесті қолдау, жастардың бастамаларын көтермелеу сияқты мәселелердің барлығы партияның бағдарламалық мақсаттарымен үндес екенін атап өтті. Алия Мақсұтқызының айтуынша, бүгінгі таңда мемлекет пен партияның басты мақсаты – халықтың тұрмыс деңгейін арттыру және әр азаматтың әл-ауқатын жақсартуға жағдай жасау.
Кездесу барысында тұрғындар өздерін толғандырған мәселелерді ашық айтты. Олардың қатарында инфрақұрылымдық түйткілдер, қоғамдық көлік қозғалысы, абаттандыру, әлеуметтік жәрдемақы мен тұрғын үйге қатысты сұрақтар болды. Партия өкілдері әрбір ұсынысты мұқият тыңдап, шешімін табуға уәде берді. Мұндай кездесулердің тиімділігі – халықтың ойын, талабын, күнделікті өмірдегі қиындықтарын тікелей билік өкілдеріне жеткізуге мүмкіндік туғызуында. «AMANAT» партиясы қолға алған «Халықпен бірге!» бағдарламасы – ел дамуының стратегиялық бағытын айқындайтын маңызды құжат. Бағдарлама аясында партия халық алдындағы уәделерін нақты іс арқылы дәлелдеуге тырысуда. Мұның нәтижесінде азаматтардың партияға деген сенімі артып, қоғамдағы бірлік пен жауапкершілік сезімі күшейіп келеді. Қаратау ауданындағы бұл кездесу де осы саясаттың нақты көрінісі болды. Ашық пікір алмасу, тұрғындардың талап-тілегін ескеру және нақты шешімдер қабылдау – халық пен билік арасындағы өзара түсіністікті нығайтудың тиімді тетігі. Партия өкілдерінің айтуынша, мұндай форматтағы кездесулер тұрақты түрде өткізіліп, әр ауданда халықтың көкейіндегі мәселелер жүйелі түрде қаралып отырады.
