АБАЙ МҰРАСЫ – ҰЛТТЫҚ ҚҰНДЫЛЫҚ ПЕН ТҰЛҒАЛЫҚ ДАМУДЫҢ ТЕМІРҚАЗЫҒЫ
Шымкент қаласы Білім басқармасына қарасты №66 «Қазығұрт» жалпы орта білім беретін мектебінде «Ұлттық құндылықтар» айлығы аясында «Абай дана – Абай дара қазақта» атты поэзия сағаты ұйымдастырылды. Бұл іс-шара оқушылардың әдеби мұраға қызығушылығын арттырып қана қоймай, оларды терең ойлауға, адамдық қасиеттерді бағалауға, ұлттық болмыс пен рухани өркендеуге жетелейтін маңызды тәрбие алаңына айналды. Абай шығармашылығының шынайы мәнін жас ұрпаққа таныту – қазіргі білім беру жүйесі үшін маңызды бағыттардың бірі.
Поэзия сағатының басты мақсаты – ұлы ойшылдың өлеңдері мен қара сөздеріндегі құндылықтарды оқушы санасына сіңіру. Абайдың әділеттілік, еңбек, білім, ізгілік, махаббат жөніндегі ойлары – бүгінгі қоғамда тұлғаның қалыптасуына қажетті бағдар. Ақын мұрасы ұрпақты өз-өзімен жұмыс жасауға, рухани биіктікке ұмтылуға, ішкі мәдениетті қалыптастыруға жетелейді. Іс-шара барысында оқушылар ақынның өлеңдерін мәнерлеп оқып, қара сөздерінен үзінділер келтіру арқылы оның ой тереңдігін, сөз салмағын сезіне алды. Бұл шығармашылық үдеріс балалардың өзіндік ізденісін күшейтіп, поэзия әлеміне деген қызығушылығын арттырды. «Адал азамат» біртұтас тәрбие бағдарламасы шеңберінде ұйымдастырылатын мұндай іс-шаралардың маңызы ерекше. Бағдарлама балаларды ұлттық-рухани құндылықтар негізінде тәрбиелеуді көздейді. Абайдың мұрасы осы қағидалармен толық үндес. Ақын еңбектеріндегі адам болу, адалдық сақтау, білімге ұмтылу, еңбек ету, ел мен жерді қадірлеу идеялары бағдарлама ұсынатын құндылықтар жүйесінің өзегіне айналады. Поэзия сағаты барысында оқушылар дәл осы моральдық бағдарларды өз жүрегінен өткізіп, қазіргі заман жастары үшін аса маңызды рефлексия жасауға мүмкіндік алды. Шараның тәрбиелік мәні – оқушылардың ұлттық әдебиетке құрметін қалыптастыру, поэзия арқылы рухани байыту, туған тілдің тұнығын сезіндіру. Абай өлеңдерін жатқа айту балаларға тек көркем сөз өнерін ғана емес, шешендік, ойды жүйелі жеткізу, өнерге құрмет сынды құнды дағдыларды меңгеруге ықпал етті. Сонымен қатар, ақынның қара сөздерінен алынған ой-тұжырымдарды талдау оқушылардың адамгершілік ұстанымдарын нығайтып, өз мінез-құлқын саралауға жетеледі.
Бұл поэзия сағаты №66 «Қазығұрт» мектебінің оқушыларын ұлттық мәдениетке жақындатып, «Адал азамат» бағдарламасының негізгі міндеттерін жүзеге асыруға үлес қосты. Оқушылар үшін Абай әлемімен қауышу – тек әдебиетті меңгеру ғана емес, тұлғалық кемелденудің жаңа баспалдағы болды. Осындай мазмұнды іс-шаралар жас ұрпақты рухани биікке бағыттап, ел ертеңіне адал қызмет ететін азамат тәрбиелеуге қызмет етпек.
