АУДАНДЫҚ ПАРТИЯ ФИЛИАЛЫНЫҢ ТӨРАҒАСЫ ТҰРҒЫНДАРДЫ ҚАБЫЛДАДЫ
«AMANAT» партиясы Тұран аудандық филиалының төрағасы Абзал Скендірұлы қоғамдық қабылдау бөлмесінде тұрғындармен жеке кездесу өткізіп, олардың күнделікті өмірде кездесетін мәселелері мен шағымдарын мұқият тыңдады. Мұндай ашық форматтағы қабылдаулар – халық пен билік арасындағы сенімді нығайтатын, азаматтардың нақты проблемаларын шешуге мүмкіндік беретін тиімді алаң.
Қабылдауға келген тұрғындар өздерін толғандырған бірқатар мәселелерді көтерді. Соның ішінде қоғамдық көліктің қолайсыздығы мен бағытына қатысты өтініштер, көше қауіпсіздігін қамтамасыз етудегі маңызды фактор – қаңғыбас иттерді аулау мәселесі, жұмыспен қамту бағытындағы сұрақтар, әлеуметтік қолдау алу жолдары және тұрғын үйге байланысты өтініштер болды. Әр азамат өзінің жағдайын ашық айтып, шешімін күтетін мәселелерді ортаға салды. Әрбір сұрақ жеке қаралып, азаматтарға заңдық түсіндірмелер беріліп, жауапты органдармен бірлесіп шешу жолдары ұсынылды. Қажет болған жағдайда тиісті мекемелерге жолданатын хаттар дайындалып, бақылауға алынды. Мұндай қабылдаулардың басты мақсаты – тұрғындардың проблемасын кейінге қалдырмай, жедел және нақты қолдау көрсету. Бұл жұмыс бағыты Қазақстанда қалыптасып келе жатқан «Халық үніне құлақ асатын мемлекет» тұжырымдамасының айқын көрінісі. Бұл идея мемлекеттік органдардың ашықтығын арттыруды, азаматтардың пікірін ескеруді, олардың сұранысына дер кезінде жауап беруді көздейді. Әрбір тұрғын көтерген мәселенің артында жеке тағдыр, отбасы және күнделікті тіршілік бар екенін ескере отырып, мемлекеттік құрылымдар мен қоғамдық ұйымдар халықпен жақын жұмысты күшейтуге басымдық беруде. Тұран аудандық филиалындағы қабылдау – осы тұжырымдаманың практикалық түрде жүзеге асуы. Себебі азаматтардың ұсынысын тыңдау, мәселесіне терең үңілу және шешімін табу – қоғамның мемлекетке деген сенімін арттыратын маңызды қадам. Тұрғындармен тікелей байланыс олардың әлеуметтік жағдайын жақсартуға, өзекті проблемаларды дер кезінде анықтауға және жергілікті деңгейде тиімді шешім қабылдауға мүмкіндік береді.
Осындай кездесулердің жүйелі түрде өтуі азаматтардың белсенділігін арттырып қана қоймай, ел дамуына үлес қосатын қоғамдық диалогтың нығаюына жол ашады. Халықтың үні ескеріліп, әрбір өтініш назардан тыс қалмауы — жауапты әрі әділетті қоғам құрудың негізгі шарты.
