ӘСКЕРИ-ПАТРИОТТЫҚ САНАНЫ НЫҒАЙТУ – ҰЛТТЫҚ ҚАУІПСІЗДІККЕ ҚОСЫЛҒАН ҮЛЕС
Саттар Ерубаев атындағы №24 ІТ мектеп-лицейінде Шымкент қаласы Әдістемелік орталығы және Ұлттық қауіпсіздік комитетінің «А» арнаулы мақсаттағы қызмет өкілдерінің қатысуымен 11-сынып оқушыларына арналған ақпараттық-насихаттау шарасы өтті. Бұл кездесу Білім басқармасының Әдістемелік орталығының 24.11.2025 жылғы №3291 шығыс хатына сәйкес ұйымдастырылып, мақсат – жасөспірімдерге ел қауіпсіздігі саласындағы қызметтің мәні мен маңызын түсіндіру, олардың патриоттық санасын арттыру болды.
Кездесу барысында оқушыларға ҰҚК Шекара академиясына енгізілген «Арнаулы бөлімшенің офицері» оқу бағдарламасы таныстырылып, офицер мамандығының ел тәуелсіздігі мен аумақтық тұтастығын қорғаудағы ерекше рөлі жан-жақты түсіндірілді. Арнаулы мақсаттағы бөлім өкілдері әскери қызметтің жауапкершілігі, тәртібі, талаптары және болашақ офицерге қойылатын кәсіби дағдылар туралы мазмұнды ақпарат берді. Сонымен бірге, мамандыққа қызығушылық танытқан жастарға қабылдау шарттары мен білуге тиіс негізгі талаптар егжей-тегжейлі түсіндірілді. Шараға №24, №25, №28, №36 және №44 мектептердің 11-сынып ұл оқушылары қатысып, өздерін толғандырған сұрақтарына тікелей офицерлерден жауап алды. Жастар арасында офицерлік қызметке деген қызығушылықтың артуы, елге қызмет етуге деген ынтаның көтерілуі кездесудің нәтижелі өткенін көрсетті. Бұл іс-шара «Адал азамат» біртұтас тәрбие бағдарламасының әскери-патриоттық бағыттағы құндылықтарымен толық үндеседі. Бағдарлама жас ұрпақтың отансүйгіштік рухын күшейтіп, жауапкершілігі жоғары, ел қауіпсіздігін бағалайтын тұлға қалыптастыруды көздейді. №24 ІТ мектеп-лицейінде ұйымдастырылған кездесу осы мақсаттарды жүзеге асыруға елеулі үлес қосып, оқушылардың азаматтық ұстанымын бекіте түсті.
Жалпы, мұндай ақпараттық-насихаттық жұмыстар жасөспірімдердің кәсіби бағдарын нақтылап қана қоймай, олардың ұлттық қауіпсіздікке қатысты түсініктерін тереңдетеді. Ұландардың елге қызмет етуге деген ынтасының артуы – келешек офицерлердің қалыптасуына, ал қоғамның қауіпсіздігіне тірек болатын маңызды қадам. Айта кету керек, «Адал азамат» тәрбие бағдарламасы еліміздегі барлық мемлекеттік білім ошақтарында, оның ішінде жекеменшік барлық білім беру ұйымына енгізіліп, іске асырылып келе жатыр.
