ОБЛЫС ӘКІМІ «YDA HOLDING» КОМПАНИЯСЫНЫҢ БАСҚАРМА ТӨРАҒАСЫ ХУСЕЙН АРСЛАНМЕН КЕЗДЕСТІ
Түркі әлемінің рухани темірқазығы, көне мен келешектің алтын бесігі саналатын киелі Түркістан шаһары бүгінде жаһандық деңгейдегі ірі инвестициялық жобалардың, құрылыс пен жасампаздықтың нағыз орталығына айналып үлгерді. Осы орайда, Түркістан облысының әкімі Нұралхан Көшеров пен түркиялық алпауыт «YDA Holding» компаниясының басқарма төрағасы Хусейн Арсланның арасында өткен мазмұнды кездесу өңірдегі бауырластық байланыстар мен экономикалық серіктестікті жаңа бір белеске көтерді.
Басқосу барысында тарихи шаһарда бой көтеріп жатқан 570 орындық заманауи көпбейінді аурухананың құрылысын толықтай аяқтап, пайдалануға беру, аймақтағы өзге де ауқымды инвестициялық жобаларды бірлесе жүзеге асыру және екіжақты тиімді ынтымақтастықтың көрігін қыздыру мәселелері кеңінен талқыланды. Облыс басшысы Түркістанның қайта түлеп, заманауи кейіпке енуіне Түркия тарапынан құйылған тікелей инвестициялар мен бірлескен жобалардың қосқан үлесі орасан зор екенін ерекше ілтипатпен атап өтті. «Қасиетті Түркістан топырағына қош келдіңіздер. Сұлтандар мен ишандар мәңгілік мекен тапқан бұл киелі шаһарда жуырда ғана Түркі мемлекеттері ұйымының бейресми саммиті өте жоғары деңгейде ұйымдастырылып, табысты аяқталды. Мәртебелі меймандар мен бауырлас елдердің басшылары Түркістанның бүгінгі ғаламат даму қарқынын, ауқымды іс-шараның жоғары деңгейде ұйымдастырылуын өте жоғары бағалады. Түркістан – күллі түркі дүниесін бір арнаға біріктіруші алтын көпірге айналып отыр. Бұл ретте сіздер басқарып отырған «YDA Holding» компаниясының қысқа уақыт ішінде халықаралық заманауи әуежайды салып бергенін, дәл соның арқасында бес бірдей мемлекеттің басшысы тарихи қаламызға тікелей ұшып келгенін мақтанышпен айта кеткен жөн. Қазіргі таңда сіздермен бірлесіп, халық саулығы үшін аса маңызды 570 орындық көпбейінді аурухананың құрылысын жүргізіп жатырмыз. Алдағы уақытта біздің өңірдің ауыл шаруашылығы мен өндіріс салаларына да инвестиция салуға шақырамын. Біз кез келген бағытта әріптестікті жалғастыруға дайынбыз», – деді Нұралхан Көшеров Түркістан облысының инвестициялық әлеуеті мен туризмді дамытудың басым бағыттарына тоқталып. Сонымен қатар, өңірде инвесторлар үшін барлық қолайлы жағдай жасалғанын және шетелдік серіктестермен бірлескен жобаларды жүзеге асыруға әкімдік тарапынан барынша қолдау көрсетілетінін жеткізді.
Өз кезегінде түркиялық инвестор, «YDA Holding» компаниясының басқарма төрағасы Хусейн Арслан да Түркістан өңірінің көз ілеспес жылдамдықпен қарқынды дамып келе жатқанын тілге тиек етіп, алдағы уақытта да бірлескен бастамаларды жан-жақты қолдауға әзір екенін білдірді. «Ең алдымен, сіздерді халықаралық деңгейдегі саммитті өте жоғары деңгейде өткізгендеріңізбен шын жүректен құттықтаймын. Түркістан бүгінде өзінің тарихи миссиясын абыроймен атқарып отыр. Мен бұл қаланың ескі, тозығы жеткен кезін де, қазіргі жаңа, зәулім кейпін де өз көзіммен көрген жанмын. Шаһардың осындай қысқа мерзімде адам танымастай өзгеруі бізді ерекше қуантады. Сондықтан жаңа инвестициялық жобаларды талқылауға әрқашан әзірміз. Ал өзіміз қолға алған 570 орындық аурухананың құрылысын осы жылдың соңына дейін толық аяқтап, тапсыруды көздеп отырмыз. Бұл нысан заманауи медицинаның ең озық талаптарына сай келетін өте жоғары деңгейдегі емдеу мекемесі болады деп нық сеніммен айта аламын», – деді Хусейн Арслан.
Айта кетерлігі, Түркістан қаласында бой көтеріп жатқан бұл зәулім көпбейінді аурухананың құрылысы үшін арнайы 15,6 гектар үлкен жер телімі бөлінген болатын. Нысанның іргетасы 2020 жылдың мамыр айында республикалық мемлекеттік-жекешелік әріптестік аясында қаланып, құрылыс жұмыстары бастау алған еді. Бүгінгі таңда құрылыстың 86 пайызы толықтай аяқталып, соңғы мәреге жақындап қалды. Аталған ауқымды жобаны сатып алу және оны заманауи медициналық құрал-жабдықтармен қамтамасыз ету бойынша Қазақстан Республикасының Денсаулық сақтау министрлігі мен мүдделі тараптар арасында тиісті келісімдер мен құжаттар заңды түрде жасалған. Көптен күткен бұл заманауи емдеу орталығы есігін айқара ашқан сәтте, тек Түркістан қаласының ғана емес, бүкіл оңтүстік өңірінің медицина саласын дамытуға, ана мен бала денсаулығын қорғауға және халыққа көрсетілетін медициналық көмектің сапасын еуропалық деңгейге көтеруге зор серпін берері сөзсіз.
