ШЫМКЕНТТЕ ЖАҢАДАН ҚҰРЫЛҒАН АГРО-ИНДУСТРИАЛДЫ АЙМАҚТА 6 ЖОБА ЖҮЗЕГЕ АСЫРЫЛАДЫ

Шымкентте ауыл шаруашылығы саласында 6 жоба жүзеге асып, нәтижесінде жаңадан 500-ден астам жұмыс орны құрылады деп хабарлайды uakit.kz қалалық әкімдіктің баспасөз қызметіне сілтеме жасап.

Бұл туралы қала әкімі Мұрат Әйтеновтың төрағалығымен өткен жиында айтылды. Аталған жобалар жаңадан құрылған агро-индустриалды аймақта жүзеге асады. Құрылыс барысында 300-ге жуық адам жұмыспен қамтылмақ.

Қалалық ауыл шаруашылығы және ветеринария басқармасының басшысы А.Қаныбековтың сөзінше жобаларды сәтті жүзеге асыру мақсатында екі кезеңді қамтитын жол картасы дайындалған екен.

«Жол картаға сәйкес бірінші кезеңде агро-индустриалдық аймақта 30 га өнеркәсіптік жылыжай кешенін салушы инвесторларға жер үйлестіруге қажетті құжаттары жинақталды. Өз кезегінде, жеке инвесторлар жылыжай кешенін салу жобаларын 2020-2022 жылдар аралығында жүзеге асыру көзделуде. Ал, екінші кезеңнің жобалары 2025 жылға дейін жүзеге асырылатын болады»,-деді басқарма басшысы.

Осы ретте, қала басшысы агро-индустриалды аймақты дамыту арқылы қаланың азық-түлік қауіпсіздігін қамтамасыз етіп, ауыл шаруашылық өнімдерінің импортталуын азайту қажет екенін айтты.

«Агро-индустриалды аймақтарды құрудағы басты мақсат – қаламыздың инвестициялық мүмкіндігін арттырып, ауыл шаруашылығы саласында инвесторларға қолайлы жағдай жасау. Жобада ауыл шаруашылығы саласын дамытып, аграрлық секторды экономиканың қозғаушы күшіне айналдыру көзделіп отыр, сондықтанда тиісті ұйымдастыру жұмыстарына қарқын беру керек»,-деді М.Әйтенов.

Агро-индустриалды аймақтың негізгі артықшылықтары: инженерлік-коммуникациялық инфрақұрылымды шаруаларға тегін жеткізу, кәсіпкерлерге субсидия алуға қолдау көрсету, өнімді тасымалдау мен сақтауды ұтымды ұйымдастыру. Ал жалпы инвестиция құны 5,5млрд теңгені құрайды.

uakit.kz

ПІКІР ЖАЗУ