ЖЫЛЫЖАЙ ШАРУАШЫЛЫҒЫ ЖЫЛ ӨТКЕН САЙЫН ДАМЫП КЕЛЕДІ
Еліміздегі жылыжайдың негізгі бөлігі оңтүстікте орналасқан. Табиғаты тамылжыған өңірдің шаруалары бүгінде аталған кәсіп түрін жетік меңгеріп, қыруар пайдаға кенеліп отыр. Оның үстіне, шаруамен айналысқысы келетін азаматтарға да көптеп қолдау көрсетілуде. Оның қатарында Шымкент қаласы да бар.
Үшінші мегаполис аумағында қазіргі таңда 204 га болған 113 жылыжай кешені орналасқан. Оның ішінде аумағы 71 га құрайтын 23 өнеркәсіптік жылыжайда ауылшаруашылық өнімдері өсірілуде. Бұл жылыжайларда жылына 17 мың тоннадан астам қызанақ, қияр және басқа да көкөніс өнімдері өндіріледі. Өнімдер ішкі нарықты қамтып қана қоймай, көрші елдерге экспорт жасалады. Бүгінде қала тұрғындарына балғын көкөніс жеткізіп отырған кешеннің бірі – Бозарық тұрғын алабында орналасқан «Зауре» жылыжайы. Аумағы 3 гектарлы өндірістік жылыжай кешені 2020 жылы іске қосылған. Жылыжай «Агроөнеркәсіптік кешен субъектісі инвестициялық салынымдар кезінде жұмсаған шығыстардың бір бөлігінің орнын толтыру бойынша субсидиялау» және тыңайтқыш құнын субсидиялау бағдарламалары бойынша мемлекеттен қолдау алғаннан кейін көкөніс өндіру ісі өркендеді. Түркияның алдынғы қатарлы технологиясымен жабдықталды. Жылына 600 тонна өнім өндіріліп отырған агрокешенде 30-дан астам адам жұмыспен қамтылып, қызанақтың органза, мэрлис және тарелино түрлері өсіріліп жатыр. Өнімдер қала нарығы мен еліміздің солтүстік өңірлеріне саудаланады. Айта кету керек, қазіргі уақытта қалада бағаны тұрақтандыру бағытында сауда-логистика аймағында 4 жаңа қойманың және 1 көтерме-тарату орталығының құрылысы жоспарлануда. Әлеуметтік маңызы бар 19 азық-түлік тауарлары бойынша тұрақтандыру қорына бюджет есебінен 7,7 млрд теңге бөлініп, ірі сауда желілеріне, жергілікті тауар өндірушілерге және бизнес субъектілеріне айналым қаражаты берілген. Жылысай кәсібі өркендесе, өңірдегі көкөністің бағасы тұрақтанатыны белгілі. Аталған бағыттағы жұмыстар алдағы уақытта жалғаса береді. Жемісті жұмыстардың нәтижесін көрер күн де алыс емес секілді. Анығы уақыттың еншісінде әрине…
