ШЫМКЕНТТЕ «ЕГЕМЕН ҚАЗАҚСТАННЫҢ ТӘУЕЛСІЗДІК ТАРИХЫ» АТТЫ ІС-ШАРА ӨТТІ
Шымкенттегі Сайрам мәдениет үйінде «Егемен Қазақстанның Тәуелсіздік тарихы» атты іс-шара өтті, деп хабарлайды Uakit.kz.
Сайрам мәдениет үйінде өткен салтанатты іс-шараға жергілікті тұрғындар, оқушылар мен мәдениет және білім саласының қызметкерлері қатысты. Шымкент қалалық Ішкі саясат және жастар істері жөніндегі басқармасының ұйымдастыруымен өткен мерекелік басқосуда басқарманың бөлім басшысы Серғазы Әбілхаиров құттықтау сөз сөйледі.
«Өздеріңізге белгілі, биыл 25 қазан – Республика күнін мереке ретінде Жарлығымен бекіткен Мемлекет басшысы Республика күні елдің мемлекет құру жолындағы тарихи қадамның символы болуы керек екенін атап өтті. Әр ұлт, әр халық үшін тәуелсіздіктен артық құндылық жоқ. Тұғырлы тәуелсіздік еліміздің басына бақ болып қонған сәттен бері егемен Қазақстан түрлі жетістіктерге қол жеткізіп, елеулі өзгерістерді басынан өткізді. Бүгінде еліміз алып құқықтық-демократиялық ел ретінде әлемге танылып отыр. Бостандық пен еркіндіктің бастауы болып табылатын бейбітшіліктің шуақты күні сіздерге иігілік пен бақыт, бақ-дәулет, ырыс-ынтымақ тілеймін! Тәуелсіздік жылындағы толағай табыстар одан әрі арта берсін!» – деді Серғазы Кәрімұлы.
Жиында елдің дамуында елеулі үлесін қосып, еңбек сіңірген бірқатар азамат Шымкент қалалық Ішкі саясат және жастар істері жөніндегі басқармасы басшысының Алғыс хатымен марапатталды. Олардың қатарында білім беру және мәдениет саласының мамандары және қоғамдық жұмыспен айналысатын қызметкерлер бар.
Салтанатты жиын бұдан кейін жергілікті өнерпаздардың мерекелік концерттік бағдарламасымен ұласып, шараға қатысқан қонақтарға көтеріңкі көңі-күй сыйлады. Сондай-ақ жиынға қатысушыларға мерекелік белгі ретінде сыйлықтар үлестірілді.
