АРНАУЛЫ ӘЛЕУМЕТТІК ҚЫЗМЕТТЕР КӨРСЕТУ ОРТАЛЫҒЫНДА КЕЗДЕСУ ӨТТІ
Қазақстандағы әлеуметтік қызмет саласы – халықтың әл-ауқаты мен өмір сапасын жақсартуда маңызды орын алатын бағыттардың бірі. Әсіресе арнаулы әлеуметтік қызметтер көрсету орталықтары – қоғамның ең әлсіз топтарына қамқорлық танытып, қолдау көрсететін мекемелер. Мұндай орталықтарда жұмыс істейтін қызметкерлердің еңбегі елеусіз қалмауы тиіс. Жуырда «Қалың қалай, бастауыш ұйым» акциясы аясында «Қызмет» салалық кәсіподағы Шымкент қалалық филиалы №1 арнаулы әлеуметтік қызметтер көрсету орталығының ұжымымен кездесіп, олардың әлеуметтік жағдайына, еңбек құқықтарының сақталуына ерекше көңіл бөлді.
Кездесуге филиал төрағасы Серік Әуесханов пен орталықтың кәсіподақ төрайымы Әсел Әсетқызы қатысып, қызметкерлермен ашық пікір алмасу өткізді. Жиын барысында еңбек қатынастары, қауіпсіздік талаптары, жұмыс орнындағы заңдық нормалар жайлы түсіндірме жұмыстары жүргізілді. Бұл шара тек ақпараттық сипатта ғана емес, сонымен бірге қызметкерлердің құқықтық сауаттылығын арттыруға, еңбек қауіпсіздігі мәдениетін күшейтуге бағытталғаны анық. Сонымен қатар, қатысушыларға Қазақстан Республикасы Кәсіподақтар федерациясының ХХVII-съезінде және «Қызмет» салалық кәсіподағының XII-съезінде қабылданған шешімдер таныстырылды. Әсіресе 2025-2030 жылдарға арналған кәсіподақ бағдарламасы әлеуметтік қолдауды кеңейту, еңбеккерлердің құқықтарын қорғау, жұмыс орындарында әлеуметтік әріптестікті нығайту бағыттарын қамтитыны ерекше атап өтілді. Бұл – әлеуметтік салада қызмет атқаратын мамандардың кәсіби және әлеуметтік жағдайын жақсартуға негіз болатын құжат. Жиын соңында қызметкерлерге мерекелік құттықтаулар айтылып, олардың еңбегі марапатталды. Алда келе жатқан Қазақстан Республикасының Конституциясы күні және Ата заңымыздың 30 жылдығына орай арнаулы әлеуметтік қызмет орталығының бірқатар қызметкерлеріне кәсіподақ наградалары табысталды. Мәселен, «Еңбек озаты» төсбелгісі әлеуметтік жұмыс жөніндегі маман Жаған Гүлзәт Күмісбекқызы мен заңгер Үсіп Фариза Ешетқызына берілді. Бұл – тек олардың жеке еңбегінің ғана емес, жалпы әлеуметтік қызметкерлердің қоғамдағы орнының жоғары екенін көрсететін символдық қадам. Сондай-ақ «Құрмет грамоталарымен» дәрігер-стоматолог Тешабаев Дияржан Бахтиярұлы, дәрігер-невропатолог Турдахунов Мурод Амантаевич және шаруа бикесі Халмуратова Феруза Мавлановна марапатталды. Бұл мамандардың әрқайсысы орталықтағы тұрғындарға өз саласы бойынша кәсіби көмек көрсетіп, олардың өмір сапасын арттыруға үлес қосып келеді.
«Алғыс хаттар» палата санитары Ахмаджанова Нигора Сайдыкаримовнаға, массажист Әбдібаева Ұлмекен Полатқызына және санитар тазалаушы Ермекбаева Кулзейнеш Маттаевнаға тапсырылды. Бұл марапаттар олардың күнделікті қарапайым, бірақ аса маңызды еңбегінің бағаланғанын дәлелдейді. Әсіресе санитарлық қызметкерлер мен массажистердің жұмысы көпшілікке көзге көрінбеуі мүмкін, алайда олардың еңбегі пациенттердің сауығуында, тұрмыс сапасын жақсартуда шешуші рөл атқарады. Бұл шара әлеуметтік саладағы кәсіподақтардың нақты қолдауын айқындады. Қызметкерлердің құқықтарын қорғаумен қатар, олардың кәсіби және адамгершілік тұрғыдан мойындалуы – еңбек беделін арттыруға ықпал етеді. Сонымен бірге, осындай марапаттар жас мамандарды ынталандырып, әлеуметтік қызмет саласында тұрақтылықты қамтамасыз етеді. Қорытындылай келе, арнаулы әлеуметтік қызмет орталықтары – қоғамның әлеуметтік әділеттілігін айқындайтын мекемелер. Мұнда еңбек етіп жүрген әр қызметкердің еңбегі ерекше құрметке лайық. «Қалың қалай, бастауыш ұйым» акциясы аясында өткен бұл кездесу тек қана кәсіподақ мүшелері үшін емес, жалпы қоғам үшін маңызды үлгі болып табылады. Ол еңбек адамының құндылығын насихаттап, әлеуметтік әділеттіліктің нақты көрінісін көрсетті.
