ПЕДАГОГ КАДРЛАРДЫ ІРІКТЕУДЕГІ АШЫҚТЫҚ – БІЛІМ САПАСЫНЫҢ КЕПІЛІ
Білім беру жүйесінің сапасы ең алдымен оны қалыптастыратын педагог кадрларға байланысты. Ұстаз – жас ұрпақтың бойына білім мен тәрбие дарытатын тұлға болғандықтан, олардың кәсіби деңгейін қамтамасыз ету – қоғам үшін стратегиялық маңызы бар міндет. Осы тұрғыда кадрларды жұмысқа қабылдау үдерісінің әділ, ашық және заңға сәйкес жүзеге асуы ерекше рөл атқарады.
Шымкент қалалық білім және ғылым қызметкерлері кәсіподағы комитетінің аппараты бұл бағыттағы қоғамдық бақылау жұмысын белсенді атқарып келеді. Кәсіподақ өкілдерінің конкурстық комиссия жұмысына қатысуы – білім беру ұйымдарына кадрларды іріктеудің ашықтығын қамтамасыз ететін маңызды қадам. Мұндай тәжірибе білім беру саласында әділдік қағидатын нығайтып, мұғалімдер мен қоғамның сенімін арттырады. Жақында өткен конкурстарға кәсіподақтың бірнеше өкілі қатысып, бақылаушы әрі шешім қабылдаушы ретінде өз үлесін қосты. Мәселен, Л.В. Тұрғынбаева Экология, өлкетану және туризм орталығындағы конкурстық комиссияға төрағалық етіп, сонымен қатар №49 «Жасұлан» бөбекжай-балабақшасының комиссиясының жұмысына атсалысты. Ал А.Ж. Дүйсенбиев пен Ж.Ж. Бақбаева №2 арнайы есту қабілеті бұзылған балаларға арналған мектеп-интернаты мен Индустриалды-техникалық колледждегі комиссия құрамында болды. Бұл үрдіс кездейсоқтық емес. Кәсіподақ ұйымдарының басты міндеттерінің бірі – ұстаздардың құқықтарын қорғау және олардың еңбек жағдайын жақсарту. Сол себепті кадрларды қабылдау кезінде олардың қатысуы педагогтердің мүдделерінің ескеріліп, әділ шешім шығуына ықпал етеді. Әсіресе жас мамандар үшін конкурс нәтижесінің ашық әрі шынайы болуы олардың кәсіби мотивациясын арттырып, білім беру саласында тұрақты жұмыс істеуіне негіз болады.
Кәсіподақ өкілдері атап өткендей, «конкурс адал өткенде, мұны мұғалімдер бірден сезеді». Бұл сөздің астарында үлкен мән жатыр. Педагогикалық ұжымдағы сенім – бүкіл білім беру жүйесінің сапасына тікелей әсер етеді. Егер мұғалім өз құқығының қорғалғанына, еңбегінің бағаланатынына көз жеткізсе, ол білім беру ісіне бар ынтасымен кіріседі. Керісінше, күмәнді шешімдер мен әділетсіздік орын алса, ол тек жеке ұстазға емес, жалпы білім беру процесіне кері ықпалын тигізеді. Шымкент қаласында білім беру ұйымдарындағы кадрлық саясаттың ашық жүргізілуі – бүкіл өңірдегі педагогикалық қауымдастықтың мәртебесін көтеріп, қоғамдағы сенімді күшейтеді. Бұл үрдістің жүйелі түрде жалғасуы кадрларды сапалы іріктеуге, жас мамандарға жаңа мүмкіндіктер беруге және білім беру саласын жетілдіруге жол ашады. Қорыта айтсақ, ұстаз – елдің ертеңін қалыптастыратын тұлға. Оларды әділ әрі ашық конкурс арқылы іріктеу – мемлекеттің дамуына қосылған маңызды үлес. Кәсіподақтардың осы саладағы белсенділігі қоғамда әділеттілік қағидатын нығайтып, педагогтардың абыройын арттыруда айрықша рөл атқарып отыр.
