ҚАЛА ӘКІМІНІҢ ОРЫНБАСАРЫ ТҰРҒЫНДАРДЫ ҚАБЫЛДАДЫ
«AMANAT» партиясының бастамасымен өтіп жатқан қоғамдық қабылдаулар тұрғындар үшін өзекті мәселелерін тікелей билік өкілдеріне жеткізуге мүмкіндік беріп келеді. Мұндай кездесулер халықтың өтініш-тілегін тыңдап қана қоймай, нақты шешімдер қабылдауға жол ашады. Соның айқын мысалы – Шымкент қалалық филиалының Қоғамдық қабылдау бөлмесінде ұйымдастырылған шара.
Қабылдауға Шымкент қаласы әкімінің орынбасары Сәрсен Құранбек арнайы қатысып, тұрғындардың өтініштерін тыңдады. Іс-шара «Құқықтық кеңес» партиялық жобасы аясында өтті. Сонымен бірге кездесуге «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, сондай-ақ бірқатар басқармалардың басшылары мен өкілдері қатысты. Бұл – көтерілген мәселелерді бірден талқылап, шешу үшін қолайлы жағдай туғызған қадам. Қабылдауда айтылған өтініштердің басым бөлігі мәдениет, инфрақұрылым және тұрғын үй мәселелеріне қатысты болды. Қайнарбұлақ елдімекенінің көпбалалы тұрғыны қызына жұмыс табу мәселесін көтерді. Жастар арасындағы жұмыссыздық – тек Шымкенттің ғана емес, ел көлемінде өзекті мәселе. Әкім орынбасары өтінішті назарға алып, оның қызын Жастар орталығына жұмысқа орналастыруға қолдау көрсетті. Бұл әрекет мемлекеттік органдардың жастарды жұмыспен қамтуға бағытталған нақты қадамы ретінде бағалануы мүмкін. Ақтас шағын ауданының зейнеткер тұрғыны елді мекенге спорт алаңшасын салу жөнінде ұсыныс айтты. Қаладағы спорт инфрақұрылымының жетіспеуі – тұрғындардың өмір сапасына әсер ететін маңызды фактор. Бұл мәселені назарға алған әкім орынбасары Жер басқармасына тиісті тапсырма беріп, жер учаскесінің жағдайы анықталғаннан кейін заңға қайшы кедергілер болмаса, спорт алаңшасы салынатынын жеткізді. Мұндай шешімдер тұрғындардың әлеуметтік белсенділігін арттырып қана қоймай, жастарды салауатты өмір салтына баулуға ықпал етеді.
Бадам шағын ауданының тұрғыны шығармашылық қолдауға қатысты өтінішін білдірді. Ол өзі шығарған кітаптың таралуына жәрдемдесуді және жеке шығармашылық кеш өткізуге қолдау көрсетуді сұрады. Әкім орынбасары оған бұған дейін кітапханада шығармашылық кеш өткізуге қолдау көрсетілгенін еске салып, алдағы уақытта кітап шығару мәселесін демеушілер көмегі арқылы шешу жолдарын қарастыруға болатынын түсіндірді. Бұл оқиға мәдениет пен шығармашылықты қолдауда мемлекеттік құрылымдардың тікелей рөлі шектеулі болғанымен, қоғамдық және демеушілік бастамалардың маңызы зор екенін көрсетті. Жалпы қабылдау барысында әрбір азамат өз сұрағына нақты жауап алды. Мұндай қабылдаулардың тиімділігі бірнеше қырынан байқалады. Біріншіден, тұрғындар билік өкілдеріне тікелей шағымын жеткізу арқылы мәселесін жылдам шешуге мүмкіндік алады. Екіншіден, әкімдік пен партия өкілдерінің бірлесіп жұмыс істеуі – халықтың сенімін нығайтады. Үшіншіден, әлеуметтік, инфрақұрылымдық және мәдени мәселелердің қатар көтерілуі қоғамдағы түйткілдердің әр алуан екенін көрсетеді. «AMANAT» партиясының өкілдері мұндай кездесулер алдағы уақытта да жалғасатынын атап өтті. Бұл тек партияның ғана емес, жергілікті биліктің де халықпен етене жұмыс істеуге дайын екенін білдіреді.
