АТА-АНА, ҰСТАЗ ЖӘНЕ МЕКТЕП ЫНТЫМАҚТАСТЫҒЫ – АДАЛ АЗАМАТ ТӘРБИЕСІНІҢ КЕПІЛІ
Түркістан қаласы Білім бөлімінің «Ө.Жәнібеков атындағы №27 IT мектеп-лицейінде» 2025 жылдың 11-12 қыркүйек күндері «Адал азамат тәрбиелеудегі жауапты ата-ана, қолдаушы ұстаз және қауіпсіз мектеп» тақырыбында сыныпаралық ата-аналар жиналысы өтті. Бұл жиынға 3, 4, 5, 8 және 11-сыныптардың ата-аналары қатысып, оқу-тәрбие үдерісінің маңызды бағыттары талқыланды.
Мектеп, ұстаз және ата-ана арасындағы байланысты нығайту – қазіргі білім беру жүйесінің басты міндеттерінің бірі. Баланың сапалы білім алуы мен толыққанды тәрбие көруі тек мектептің немесе отбасының ғана міндеті емес, бұл – екі жақтың ортақ жауапкершілігі. Ал олардың өзара ынтымақтастығы неғұрлым тиімді болса, жас ұрпақтың болашағы да соғұрлым жарқын болмақ. Жиынның негізгі мақсаты – оқушыларды адалдыққа, жауапкершілікке және қауіпсіздік мәдениетіне тәрбиелеуде ата-ана мен мектептің серіктестігін арттыру. Бұл бағыттағы жұмыстар бірнеше міндеттер арқылы айқындалды — ата-аналардың мектеп өміріне белсенді қатысуын қамтамасыз ету, баланың тәртібі мен оқуына ата-ананың жауапкершілігін арттыру, ұстаздар мен ата-аналар арасында тұрақты байланыс орнату, мектепте қауіпсіз ортаны қалыптастыру үшін бірлескен шараларды үйлестіру және адал, отансүйгіш ұрпақ тәрбиелеуде ортақ іс-әрекеттердің маңызын түсіндіру. Бұл міндеттердің әрқайсысы – қазіргі замандағы білім беру үдерісінің өзекті мәселелерін шешуге бағытталған. Өйткені қоғамдағы кез келген өзгеріс ең алдымен мектептен басталады. Жиналыс барысында қабылданған шешімдер ата-ана мен мектеп арасындағы байланысты жаңа деңгейге көтеруге бағытталды. Біріншіден, ата-аналардың мектеппен қарым-қатынасы нығаяды. Екіншіден, оқушы тәрбиесіне, әсіресе оның қауіпсіздігіне деген ата-ананың назарын күшейту көзделді. Үшіншіден, мектеп әкімшілігі, ұстаз және ата-ана арасындағы ынтымақтастықты нығайту арқылы оқушыларды қоғамға пайдалы, адал, жауапты тұлға ретінде тәрбиелеуге үлес қосылады.
Жиналыста үш негізгі мәселе қаралды. Бірінші мәселе – мектеп пен ата-аналар комитетінің бірлескен жұмысын ұйымдастыру. Мұнда тәрбие және білім беру үдерісіне ата-аналарды белсенді түрде тарту, мектепішілік іс-шараларға олардың қатысуын арттыру, оқушылардың дамуына бірлесе ықпал ету жолдары талқыланды. Ата-аналар комитетінің рөлі тек ұйымдастырушылық деңгейде емес, сонымен қатар оқу сапасын жақсартудағы серіктестік ретінде қарастырылды. Екінші мәселе – сынып ата-аналар комитетінің қызметін үйлестіру ерекшеліктеріне арналды. Әр сынып деңгейінде комитет мүшелерінің негізгі міндеттері нақтыланып, олардың мектеп әкімшілігімен байланыс орнату жолдары түсіндірілді. Ата-аналар тарапынан оқушылардың бос уақытын тиімді ұйымдастыру, сыныпішілік тәрбие жұмыстарын күшейту және қауіпсіздік шараларын жетілдіру жөнінде нақты ұсыныстар айтылды. Бұл ұсыныстардың ішінде балалардың интернеттегі қауіпсіздігін қамтамасыз ету, мектептен тыс ортадағы тәртібін бақылау, спорттық және мәдени шараларға қатыстыру сияқты мәселелер қамтылды. Үшінші мәселе – сынып ата-аналар комитетінің төрағасы мен алқасын сайлау болды. Әр сыныптың ата-аналары ашық дауыс беру арқылы комитет құрамын бекітті. Жаңа сайланған төрағалар мен мүшелер алдағы оқу жылында мектепішілік іс-шараларға белсенді қатысуға, ата-аналар мен ұстаздар арасындағы көпір болуға дайын екендіктерін білдірді. Бұл жиын ата-аналардың мектеп өміріне деген қызығушылығын арттырып қана қойған жоқ, сонымен бірге олардың баланың оқуына, тәртібіне және қауіпсіздігіне қатысты жауапкершілігін де күшейтті. Әрбір ата-ана өз баласының табысты болашағы мектеп пен отбасының бірлескен еңбегіне байланысты екенін терең түсінді. Жиын барысында қауіпсіз мектеп құру мәселесі де кеңінен талқыланды. Қазіргі таңда балалардың денсаулығы мен өмір қауіпсіздігін қамтамасыз ету ең өзекті мәселенің бірі. Осыған байланысты мектеп пен ата-аналар оқушылардың қауіпсіздігін сақтау бағытында бірлескен әрекеттерді үйлестіруге уағдаласты.
Ө.Жәнібеков атындағы №27 IT мектеп-лицейінде өткен бұл жиналыс – ата-ана, ұстаз және мектеп ынтымақтастығын нығайтудағы маңызды қадам болды. Жиын соңында қабылданған шешімдер ата-аналар комитетінің жүйелі жұмысын ұйымдастыруға, оқу-тәрбие үдерісінің сапасын арттыруға және мектептің қауіпсіз ортасын қамтамасыз етуге бағытталды. Ең бастысы – ата-ана, ұстаз және мектептің бірлескен еңбегі арқылы адал, отансүйгіш, жауапты ұрпақ тәрбиелеу ісіне тағы бір қадам жасалды.
