БІЛІМ ОРДАСЫНДА МАҢЫЗДЫ КЕЗДЕСУ ҰЙЫМДАСТЫРЫЛДЫ
Қазіргі таңда қоғамның өркендеуі мен тұрақтылығы ең алдымен жас ұрпақтың саналы, адал және жауапты азамат болып қалыптасуына байланысты. Осы бағытта еліміздің білім беру саласында жүзеге асырылып жатқан «Адал азамат, Біртұтас тәрбие» бағдарламасы – ұлттың болашағына бағытталған маңызды қадам. Бағдарламаның басты мақсаты – мектеп пен отбасы арасындағы өзара серіктестікті нығайту арқылы бала бойында рухани-адамгершілік құндылықтарды қалыптастыру.
Осы мақсатта Шымкент қаласының Е.Юсупов атындағы №104 жалпы орта мектебінде «Мектеп пен Отбасы: Адал әрі жауапты азаматты тәрбиелеудегі өзара ынтымақтастық» тақырыбында мектепішілік ата-аналар жиналысы өтті. Іс-шараны Шымкент қаласы Әдістемелік орталығы Қазақстан Республикасы Оқу-ағарту министрлігінің нұсқауына сәйкес ұйымдастырды. Жиналысқа ата-аналар, педагогтар және мектеп әкімшілігі қатысып, тәрбие жүйесіндегі ата-ананың рөлін арттыру, мектеп пен отбасы арасындағы сенім мен серіктестікті нығайту мәселелерін талқылады. Күн тәртібіне үш негізгі тақырып енгізілді. Олар — мектеп пен ата-аналар комитетінің ынтымақтастығын арттыру жолдары, комитет қызметін үйлестірудің ерекшеліктері және комитет төрағасы мен мүшелерін сайлау.
Бүгінгі таңда мектептің білім беру үдерісінде ата-анамен байланыс орнату – тәрбие жұмысының ажырамас бөлігі. Себебі бала тұлғасы тек мектеп қабырғасында ғана емес, ең алдымен отбасында қалыптасады. Осы тұрғыдан алғанда, ата-аналар комитетінің белсенді қызметі мектептің тәрбиелік әлеуетін күшейтетін маңызды құрал болып табылады. Жиналыс барысында «Адал азамат – Біртұтас тәрбие» бағдарламасының мәні мен мазмұны кеңінен түсіндірілді. Бұл бағдарлама – оқушылардың бойында патриотизм, әділдік, еңбексүйгіштік және жауапкершілік сияқты қасиеттерді қалыптастыруға бағытталған кешенді жүйе. Оның тиімді жүзеге асуы мектеп пен ата-ананың бірлескен әрекетіне тікелей байланысты. Сондай-ақ жиында «Мектеп пен ата-ананың адал азамат тәрбиесіндегі ынтымақтастығы» тақырыбында мазмұнды пікірталас өтті. Қатысушылар өз ойларымен бөлісіп, баланың мінез-құлқы мен әлеуметтік бейімделуіне ата-ананың жеке үлгісі мен отбасылық құндылықтардың ықпалы зор екенін атап өтті. Шындығында, бала тәрбиесінде мектеп те, ата-ана да бір мақсатқа – елжанды, әділ, еңбекқор ұрпақ тәрбиелеуге ұмтылуы тиіс. Сыныптағы жағымды ахуал мен қолайлы психологиялық орта – тұлғаның жан-жақты дамуының негізгі алғышарты. Сол себепті жиналыста оқушылардың өзара қарым-қатынас мәдениетін қалыптастыру, сыныптағы моральдық-психологиялық климатты жақсарту мәселелері де сөз болды. Педагогтар мен ата-аналар бірлесе отырып, баланың оқу үлгеріміне ғана емес, оның эмоционалдық саулығына да назар аудару қажеттігін айтты. Кездесу қорытындысында ата-аналар комитетінің жаңа құрамы сайланып, мектеп пен отбасының өзара ынтымақтастығын одан әрі жетілдіру бойынша нақты ұсыныстар жасалды. Қатысушылар мұндай форматтағы кездесулердің маңызы зор екенін, өйткені ол тек есеп беру шарасы емес, өзара пікір алмасу мен тәжірибе бөлісудің тиімді алаңы екенін атап өтті.
