ШЫМКЕНТТЕ ЕКІНШІ РЕСПУБЛИКАЛЫҚ «RESPUBLICA ASYQ ATU» ТУРНИРІ ӨТТІ
Республика күні мерекесі аясында Шымкент қаласы ұлттық рух пен спорттың ордасына айналды. Осы күндері үшінші мегаполисте көне дәстүрлі ойын – асық ату бойынша еліміздегі ең ауқымды жарыс – екінші республикалық «Respublica Asyq Atu» турнирінің финалы жоғары деңгейде ұйымдастырылды. Бұл турнирге Қазақстанның барлық өңірінен келген 40 үздік спортшы қатысып, өз шеберліктерін сынға салды. Ұлттық ойынның байырғы дәстүрін жаңғыртқан дода тек спорттық сайыс емес, нағыз рухани мереке, халықты біріктірген ұлттың бірлік символына айналды. Асық ойыны арқылы қатысушылар мен көрермендер өз тамырынан нәр алған ұлттық болмысты сезініп, ата-баба мұрасын дәріптеді.
Финалдық жарыстармен қатар, қала тұрғындары мен қонақтарына арналған концерттік бағдарлама және ұлттық спорт түрлерінен шеберлік сабақтары ұйымдастырылды. Мыңдаған көрермен бұл шараны тамашалап, ұлттық мәдениетке деген қызығушылығын арттырды. Турнирдің ашылу салтанатында Парламент Мәжілісінің депутаты, Қазақстан Республикасы Асық ату федерациясының президенті Олжас Құспеков сөз сөйлеп, ұлттық спорттың қоғамдағы орны мен маңызына ерекше тоқталды. Олжас Құспековтың айтуынша, асық ойыны – халқымыздың рухани коды мен мәдени жадын сақтаған ерекше құбылыс. Оның айтуынша, асық ату – жай ғана дәстүр емес, ұлттың бірлігін, рухын және патриотизмін айшықтайтын құндылық. «Асық ату арқылы біз өз түп-тамырымызға қайта ораламыз. Бұл ойын ғасырлар бойы қазақ тұрмысының ажырамас бөлігі болған. Бүгінгі турнир – ұлттық спорттың тек өткеннің мұрасы емес, заманауи қоғамды біріктіретін мәдени қозғалыс екенін дәлелдеп отыр», – деді федерация президенті. Финалдық кезең аса тартысты өтті. Әр өңірдің үздік ойыншылары өз өңірінің намысын қорғап, жеңіс үшін бар күшін салды. Нәтижесінде Ақтөбе облысының спортшысы Құлыбек Ғарышбек турнирдің бас жүлдесін жеңіп алды. Ол қазақстандық автокөлік компаниясы ұсынған жаңа көліктің иегері атанды. Екінші орын Түркістан облысының өкілі Әбілхан Талғарға бұйырып, оған 1 миллион теңге көлемінде сыйақы табысталды. Ал үшінші орын иегері Батыс Қазақстан облысының спортшысы Сламқұл Бақдәулет 500 мың теңге иеленді. Сонымен қатар AMANAT партиясының арнайы 300 мың теңгелік жүлдесі Павлодар облысының спортшысы Жаздықбай Керімге табысталды.
Жартылай финалдар мен шешуші кезеңдер асық ату шеберлерінің кәсіби деңгейінің жоғары екенін көрсетті. Турнир барысында жастардың ұлттық спортқа деген қызығушылығының артып келе жатқаны айқын байқалды. Бұл үрдіс ұлттық ойынның жаңа буын арасында кеңінен насихатталып, заманауи форматта дамып келе жатқанын дәлелдеді. Биылғы турнирдің Шымкент қаласында өткізілуі де тегін емес. Былтыр өткен алғашқы республикалық жарыста шымкенттік спортшылар үздік нәтиже көрсетіп, бас жүлдені жеңіп алған болатын. Сол себепті 2025 жылы Шымкент ресми түрде «Respublica Asyq Atu» турнирінің астанасы атанды. Бұл шешім мегаполистің ұлттық спортты дамытудағы белсенділігін және өңірдің мәдени әлеуетін айқындай түсті. Асық ату жарысы тек спорттық дода емес, ұлттың тарихи жадын жаңғыртудың, ұрпақ сабақтастығын сақтаудың жарқын үлгісіне айналды. Турнир барысында ұлттық құндылықтар дәріптеліп, жастар арасында дәстүрлі ойындарға деген құрмет күшейді. «Respublica Asyq Atu» турнирі көне ұлттық ойынды жаңа серпінмен дамытып, оны заманауи бұқаралық қозғалысқа айналдыруға зор үлес қосты. Бұл тек жарыс емес, ұлт рухының мерекесі болды. Шымкенттегі алаңда асық атқан әр спортшы мен олардың жанкүйерлері қазақтың ғасырлардан жеткен асыл мұрасын бүгінгі ұрпаққа жеткізудің куәгеріне айналды. Осылайша, Республика күні ұлттық спорт арқылы ел бірлігін, рухын және дәстүрін жаңғыртқан ерекше мерекеге ұласты.
