БАЛАЛАРҒА АРНАЛҒАН ЗАҢ ТУРАЛЫ МУЛЬТФИЛЬМ ҰСЫНЫЛДЫ
Шымкент қаласының Орталық саябағында ерекше мәдени әрі тәрбиелік жоба – «BalaZan – балалық шақтан заң жолымен» атты анимациялық фильмнің тұсаукесері өтті. Бұл бастама Шымкент қалалық полиция департаментінің идеясы бойынша қала әкімдігінің қолдауымен жүзеге асқан. Кешкілік ашық аспан астында ұйымдастырылған премьераны тамашалауға 500-ден астам бала мен олардың ата-аналары жиналды. Үлкен LED-экран арқылы көрсетілген мультфильм көрермендердің зор ықыласына бөленді.
Жобаның басты мақсаты – өскелең ұрпақтың құқықтық мәдениетін қалыптастыру, кәмелетке толмағандар арасындағы құқық бұзушылықтың алдын алу және жастар арасында заңға бағынушылық пен әділдік қағидаларын насихаттау. Қоғамдағы тәртіп пен қауіпсіздік – әр азаматтың, соның ішінде балалардың да саналы әрекетінен басталады. Осы тұрғыдан алғанда, «BalaZan» жобасы тек мультфильм емес, ол – балаларды заңды құрметтеуге, әділдік пен жауапкершіліктің мәнін түсінуге бағытталған маңызды бастама. Анимациялық фильмнің басты кейіпкері – Барыс бейнесі. Бұл таңдау тегін емес. Барыс – Қазақстанның тәуелсіздігін, еркіндігін және батылдығын білдіретін ұлттық символ. Кейіпкердің образы арқылы балаларға адалдық, достық, өзгені сыйлау және ережелерді сақтау секілді адамгершілік құндылықтар үйретіледі. Авторлардың айтуынша, фильмнің әрбір эпизоды баланың ой-санасына оң әсер ететіндей, тәрбиелік мәні жоғары сюжеттерден тұрады. Фильм көрсетілімінен бөлек, іс-шара аясында балаларға арналған интерактивті және танымдық бағдарламалар ұйымдастырылды. Қатысушылар жол қозғалысы ережелері бойынша викториналарға қатысып, өз білімін сынады. Полиция департаментінің кинологтар және криминалистер тобы өз қызметін көрсетті. Балалар қызметтік иттердің жаттығуын қызыға бақылап, криминалистердің жұмысында қолданылатын заманауи құралдармен танысты. Бұл тәжірибе жастарға құқық қорғау саласының маңызын түсіндіруге мүмкіндік берді. Сонымен қатар, іс-шара барысында арнайы жасақ қызметінің көріністері көрсетіліп, келушілерге полиция қызметінің түрлі бағыттары таныстырылды. Шара аясында ұйымдастырылған фотокөрме арқылы көрермендер ішкі істер органдарының күнделікті еңбегінен сыр шертетін көріністерді тамашалады.
Кештің көрігін қуыршақ театрының әртістері, Шымкент циркінің өнерпаздары және жол қозғалысының жас инспекторларының сахналық қойылымдары қыздырды. Балалар өздерін кейіпкерлермен бірге сезініп, құқық пен тәртіптің өмірде қаншалықты маңызды екенін түсінді. Іс-шара соңында балалар мен ата-аналар қатысқан концерттік бағдарлама ұйымдастырылды. Кештің символдық сәтінде түрлі-түсті шарлар аспанға ұшырылды – бұл ізгі ниет пен бейбітшіліктің белгісі ретінде есте қалды. «BalaZan» жобасы құқық қорғау органдарының қоғаммен жаңа форматтағы байланысын көрсетеді. Бұрынғыдай тек ресми шаралармен шектелмей, енді полиция қызметі балалардың дүниетанымына мәдени және көркем тәсілдер арқылы әсер етуді көздейді. Мұндай жобалар жас буынның бойына заңға деген құрметті сіңіріп, құқық бұзушылықтың алдын алуға септігін тигізеді. Шымкент қалалық полиция департаменті өкілдерінің айтуынша, анимациялық жобаның келесі бөлімдері де түсірілмек. Әр бөлімде балалар өмірінде кездесетін түрлі жағдайлар мен олардың заңдық тұрғыдағы шешімдері көрсетілетін болады. Яғни, фильм арқылы балалар өз құқықтары мен міндеттерін ерте жастан түсінуге мүмкіндік алады. Жобаның тағы бір ерекшелігі – оның кең аудиторияға бағытталуы. Мультфильм қазақ және орыс тілдерінде көрсетіліп, мектептер мен балалар орталықтарында, сондай-ақ әлеуметтік желілерде таратылады. Полиция департаментінің бастамасымен жүзеге асқан бұл жоба – балалардың құқықтық сауатын арттыру мен қауіпсіз өмір салтын қалыптастыруға бағытталған заманауи үлгі. Бүгінгі таңда құқықтық тәрбие тек қатаң ережелер арқылы емес, осындай креативті тәсілдермен де тиімді жеткізілуде.
