ОҚУШЫЛАРДЫҢ ҚҰҚЫҚТЫҚ МӘДЕНИЕТІН АРТТЫРУҒА АРНАЛҒАН ШАРА ӨТТІ
Шымкент қаласы білім басқармасына қарасты №86 жалпы орта білім беретін мектебінде “Заң және тәртіп” қағидаты аясында оқушылардың құқықтық мәдениетін арттыруға бағытталған танымдық шара өтті. Бұл жұмыс “Адал азамат” біртұтас тәрбие бағдарламасының құқықтық сауаттылық, жауапкершілік және тәртіп мәдениетін қалыптастыру бағыттарымен толық үндеседі. Іс-шараға Шымкент қалалық полиция департаментінің Тұран ауданы полиция басқармасынан ЖПҚБ ЮПБ ювеналды полиция тобының инспекторы, полиция капитаны Самат Ханатович Анарбаев арнайы шақырылды.
5-7 сынып оқушыларына арналған бұл кездесу жасөспірімдердің заң талаптарын түсінуіне, өз әрекетіне жауап бере алуына және қоғамдағы тәртіпке құрметпен қарауына ықпал етуді көздеді. Полиция қызметкері ең алдымен құқық бұзушылықтың түрлері, оның салдары, жасөспірімдер арасындағы жиі кездесетін тәртіпсіздік фактілері туралы түсіндірді. Қарапайым ережелерді сақтамаудың қаншалықты күрделі мәселелерге әкелуі мүмкін екенін нақты мысалдар арқылы айтып өтті. Бұл бағыт “Адал азамат” бағдарламасының заңға бағыну, қоғамдық тәртіпті сақтау және жауапты әрекет ету дағдыларын қалыптастыру бөлімін тікелей қолдайды. Сонымен қатар, оқушыларға жолда жүру ережелеріне арналған бейнероликтер көрсетілді. Бейнематериалдар балаларға қауіпсіздік талаптарын көрнекі түрде жеткізіп, жол қозғалысы кезіндегі әрбір қадамның маңызын түсінуге көмектесті. Балалар жаяу жүргінші ережелерінің негізгі тармақтарымен танысып, бағдаршам сигналдары мен жол белгілерін дұрыс қолдану жолдарын қайталады. Бұл – жас азаматтарда қауіпсіздік дағдысын қалыптастыратын маңызды қадам. Түсіндіру барысында оқушылар өздерін толғандырған сұрақтарын қойып, пікір алмасуға мүмкіндік алды. Полиция инспекторы олардың әрқайсысына түсінікті тілмен жауап беріп, мектеп жасындағы балалардың қауіпсіздігі мен тәртіп мәдениетінің отбасы және мектеп тарапынан бірдей бақылау мен қолдау арқылы нығаятындығын атап өтті.
Іс-шара жасөспірімдердің құқықтық сауаттылығын арттыруға, заңға құрметпен қарау мәдениетін қалыптастыруға және тәртіпсіздікке жол бермеуге бағытталды. “Адал азамат” бағдарламасының басты мақсаты – жауапты, саналы, тәртіпті ұрпақ тәрбиелеу. Осы тұрғыдан алғанда, полиция қызметкерінің қатысуымен өткен бұл түсіндіру жұмысы оқушылардың азаматтық көзқарасын қалыптастыруға, қауіпсіздік мәдениетін нығайтуға және қоғам алдындағы өз міндеттерін сезінуге үлкен ықпал жасады.
