ТҰРҒЫНДАРМЕН АШЫҚ ДИАЛОГ – «ХАЛЫҚ ҮНІНЕ ҚҰЛАҚ АСАТЫН МЕМЛЕКЕТТІҢ» ТИІМДІ ТЕТІГІ
«AMANAT» партиясы Еңбекші аудандық филиалының төрағасы Таймас Қамбатыров тұрғындармен кезекті жеке қабылдау өткізіп, елді мекеннің дамуына тікелей әсер ететін маңызды мәселелерді талқылады. Мұндай қабылдаулар – қоғамның сұранысын нақты естіп, тұрғындардың күнделікті өмірде туындайтын проблемаларына жедел назар аударудың тиімді жолы.
Қабылдауға келген азаматтар аудан аумағындағы өзекті мәселелерді ортаға салды. Әсіресе жолдардың сапасына қатысты шағымдар жиі көтерілді. Көпшілік көше жамап-жасқап қана қоймай, ұзақ мерзімге жарамды, сапалы жөндеу жүргізу қажеттігін айтты. Сонымен қатар аумақты көркейту жұмыстары, жасыл желекті көбейту, демалыс алаңдарын жөндеу туралы ұсыныстар білдірілді. Көше жарықтарының жеткіліксіздігі де тұрғындарды толғандыруда. Кейбір көшелердің қараңғы болуы қауіпсіздікке кері әсер ететінін айтып, жарықтандыру желісін кеңейту мәселесі көтерілді. Санитарлық тазалық пен қоқыс шығару жұмыстары да назардан тыс қалған жоқ. Тұрғындар кей аумақтарда тазалық жұмыстарының жүйелі жүргізілмейтінін айтып, бұл бағытта бақылауды күшейтуді сұрады. Бұдан бөлек, инфрақұрылымды дамытуға қатысты ұсыныстар, әсіресе балалар ойын алаңдарын көбейту және қоғамдық орындардың қолжетімділігін арттыру мәселелері де қозғалды. Таймас Қамбатыров әрбір өтінішті жеке қарап, заң аясында түсіндіру жұмыстарын жүргізді. Кейбір мәселелер сол жерде-ақ шешімін тауып, тиісті құрылымдарға тапсырма берілді. Ал күрделі немесе қосымша тексеруді қажет ететін өтініштер жауапты мекемелерге жолданып, олардың орындалуы партия филиалының бақылауына алынатыны атап өтілді. Бұл – тұрғындар тілегінің жауапсыз қалмайтынының, әрбір сұрақтың назарда болатынының нақты белгісі. Аталған жұмыс форматы елімізде жүзеге асырылып жатқан «Халық үніне құлақ асатын мемлекет» тұжырымдамасының бір көрінісі. Бұл идеяның мақсаты – мемлекеттік құрылымдардың ашықтығын арттыру, халықпен кері байланысты нығайту және азаматтардың мәселесіне дер кезінде, шынайы жауап беру. Тұрғындармен тікелей кездесіп, олардың талабын тыңдау – билік пен қоғам арасындағы сенімді бекіте түсетін маңызды қадам.
Осындай қабылдаулар халықтың әлеуметтік көңіл күйін жақсартуға да ықпал етеді. Себебі әрбір азаматтың айтқан өтініші ескерілетініне, мәселесінің назардан тыс қалмайтынына сенімді болуы – тұрақты әрі әділетті қоғам қалыптастырудың негізгі шарттарының бірі. Бұл – азаматтардың мемлекетке деген сенімін арттырып қана қоймай, олардың өз ауданының дамуына атсалысуына да мүмкіндік береді. Еңбекші ауданында өткен қабылдау тұрғындар мен билік өкілдері арасындағы ашық диалогтың қалыптасып келе жатқанын көрсетеді. Мұндай кездесулер жүйелі түрде жалғасса, көтерілген мәселелер уақытында шешімін тауып, ауданның өмір сапасы арта түсетіні сөзсіз.
