ТҰРҒЫНДАРМЕН ТІКЕЛЕЙ КЕЗДЕСУ – ХАЛЫҚТЫҢ СЕНІМІН АРТТЫРАТЫН МАҢЫЗДЫ ҚАДАМ
«AMANAT» партиясы Еңбекші аудандық филиалының атқарушы хатшысы Мақсат Жолдасбеков тұрғындарды жеке мәселелері бойынша қабылдап, олардың күнделікті өмірінде туындайтын өзекті сұрақтарын талқылады. Ашық форматтағы мұндай кездесулер азаматтардың пікірін тыңдап, нақты шешім қабылдауға мүмкіндік беретін тиімді алаң болып саналады.
Қабылдауға келген тұрғындар өз аудандарының дамуына қатысты бірқатар мәселелерді көтерді. Солардың ішінде аулаларды абаттандыру, балалар ойын алаңдарын жөндеу және көгалдандыру жұмыстары ерекше аталды. Тұрғындар қауіпсіз әрі қолайлы орта қалыптастыру мақсатында аула инфрақұрылымын жақсартуды сұрады. Жолдарды жөндеу мәселесі де өткір тақырыптардың бірі болды. Көпшілік кей көшелердің жағдайы көлік қозғалысына қолайсыз екенін айтып, жөндеу жұмыстарын жеделдетуді ұсынды. Сонымен қатар тазалық жұмыстарын күшейту, қоқыс шығару жиілігін арттыру, санитарлық талаптарды сақтау жөнінде ұсыныстар жеткізілді. Көше жарығын жақсарту да негізгі сұрақтардың бірі болды. Қараңғы көшелер тұрғындардың қауіпсіздігіне әсер ететінін айтып, жарықтандыру желісін кеңейту қажеттігі сөз болды. Бұдан бөлек, коммуналдық қызметтердің сапасына қатысты шағымдар да айтылды. Кейбір үйлерде көрсетілетін қызметтің сапасы төмен екені, тарифтер мен техникалық қызмет көрсетуге байланысты түсініксіз жайттар бар екені көтерілді. Мақсат Жолдасбеков әр тұрғынның өтінішін мұқият тыңдап, заң аясында нақты түсініктемелер берді. Тез шешім қабылдауды талап ететін кейбір мәселелер сол жерде оң шешімін тапты. Ал қосымша тексеруді қажет ететін немесе салалық мекемелердің араласуын қажет ететін өтініштер тиісті органдарға жолданып, олардың орындалуы партия филиалының тұрақты бақылауына алынатыны атап өтілді. Бұл – әрбір сұрақтың назарда болатынын және азаматтардың өтініші жауапсыз қалмайтынын көрсетеді.
Тұрғындармен тікелей кездесіп, олардың мәселесіне құлақ асу – елімізде жүзеге асырылып жатқан «Халық үніне құлақ асатын мемлекет» тұжырымдамасының негізгі қағидаларының бірі. Бұл бастама мемлекеттік органдардың ашықтығы мен қолжетімділігін арттырып, халықпен тұрақты кері байланыс орнатуды мақсат етеді. Әрбір азаматтың мұң-мұқтажын ескеріп, оның өмір сапасына әсер ететін мәселелерді шешу – әділетті қоғам қалыптастырудың басты алғышарты. Еңбекші ауданындағы қабылдау тұрғындар мен билік өкілдерінің арасындағы өзара түсіністік пен ынтымақтастықты күшейтті. Мұндай кездесулердің жүйелі түрде өтуі азаматтардың сенімін арттырып қана қоймай, жергілікті мәселелердің уақтылы шешілуіне мүмкіндік береді. Халықтың ұсынысы мен шағымы назардан тыс қалмай, әрбір айтылған мәселе бойынша іс-шаралар қабылдануы – қоғам дамуының маңызды көрсеткіші. Осылайша, тұрғындармен ашық диалог орнату және әр өтініске жедел жауап беру – «Халық үніне құлақ асатын мемлекет» қағидатын жүзеге асырудың нақты тетігі екенін тағы бір рет дәлелдеді.
