МӘСЛИХАТ ДЕПУТАТЫ АЗАМАТТАРДЫ ЖЕКЕ МӘСЕЛЕЛЕРІ БОЙЫНША ҚАБЫЛДАДЫ
«AMANAT» партиясы Тұран аудандық филиалының қоғамдық қабылдау бөлмесінде мәслихат депутаты, фракция жетекшісі Қайрат Имашев тұрғындарды жеке қабылдап, олардың түрлі саладағы мәселелері мен ұсыныстарын тыңдады. Мұндай қабылдаулар халықтың күнделікті өмірінде туындайтын мәселелерді дер кезінде анықтап, тиісті шешімдер қабылдауға мүмкіндік беретін тиімді алаң ретінде тиімді жұмыс істеп отыр.
Қабылдауға келген азаматтар негізінен инфрақұрылым жүйесін жетілдіру мәселесін көтерді. Атап айтқанда, аудан аумағындағы көшелердің жағдайын жақсарту, инженерлік желілерді жаңарту, тұрғындарға қажетті әлеуметтік нысандардың қолжетімділігін қамтамасыз ету секілді ұсыныстар болды. Сонымен қатар қоғамдық көліктердің санын көбейту қажеттігі де сөз болды. Тұрғындар кей бағыттарда автобустардың сирек жүретінін, бұл жұмыс пен оқуға қатынауға қолайсыздық туғызатынын жеткізді. Жұмыспен қамту мәселесі де өзекті тақырыптардың бірі ретінде көтерілді. Азаматтар тұрақты әрі заңды жұмыс табуға көмек көрсетуді сұрап, бос жұмыс орындары туралы ақпарат беру және тиісті құрылымдармен байланысты күшейтуді өтінді. Бұдан бөлек, қаңғыбас иттерді аулау мәселесі де тұрғындарды алаңдатып отыр. Олар кей аумақтарда жабайы иттердің көбеюі қауіпсіздікке шынайы қауіп төндіретінін айтып, бұл бағыттағы шараларды күшейтуді сұрады. Қайрат Имашев әрбір азаматтың өтінісін мұқият тыңдап, қолданыстағы заң талаптарына сәйкес жауап берді. Депутат өз сөзінде тұрғындардың барлық өтініштері партия бақылауында болатынын, әр мәселенің орындалуы бойынша жүйелі жұмыс жүргізілетінін атап өтті. Оның айтуынша, басты мақсат – халықтың нақты сұраныстарын орындап, олардың өмір сапасын арттыруға бағытталған тиімді шешімдер қабылдау. Қабылдау барысында кей мәселелер бірден қаралып, тиісті бөлімдерге тапсырмалар жүктелді. Күрделі немесе уақыт талап ететін өтініштер ресми түрде тіркеліп, сала мамандарына жолданды. Тұрғындарға заң аясында түсіндіру жұмыстары жүргізіліп, шешім қабылдаудың нақты жолдары түсіндірілді.
«AMANAT» партиясының қоғамдық қабылдаулары тұрақты түрде ұйымдастырылып, азаматтардың әлеуметтік және құқықтық мәселелерін шешуге бағытталған жүйелі жұмысқа айналып отыр. Мұндай кездесулер халық пен билік арасындағы ашық диалогты нығайтып, мемлекеттік қызметтердің сапасын арттыруға серпін береді. Тұрғындармен тікелей байланыс орнату арқылы олардың нақты мұқтажын есту – қоғам дамуындағы маңызды фактор. Әрбір өтініш назардан тыс қалмай, бақылауға алынуы – тұрғындардың билікке деген сенімін арттырып, «тыңдайтын әрі әрекет ететін мемлекет» қағидатын жүзеге асырудың айқын көрінісі.
