ТҮРКІСТАН ОБЛЫСЫНДА ӨЗІНДІК КІРІСТЕР МЕН ТҮСІМДЕР КӨЛЕМІ АРТТЫ
Түркістан облысында 2025 жылдың қорытындысы бойынша өңірдің өзіндік кірістерін арттыру бағытында оң нәтижелерге қол жеткізілді. Жыл соңындағы мәліметтерге сәйкес, өзіндік кірістер жоспары 109 пайызға орындалып, жоспарланған көрсеткіштен 25,6 миллиард теңгеге артық орындалды. Жоспар 275,2 миллиард теңге болып бекітілсе, нақты түсім көлемі 301 миллиард теңгеге жеткен. Бұл көрсеткіш облыс экономикасының тұрақты дамып келе жатқанын және қаржы тәртібінің нығайғанын көрсетеді.
Өңірдің салықтық түсімдері де жоспардан жоғары деңгейде орындалды. 2025 жылы салықтық түсімдер жоспары 107 пайызға орындалып, 16,8 миллиард теңгеге артығымен қамтамасыз етілді. Жоспарланған 230,3 миллиард теңгенің орнына бюджетке 247,1 миллиард теңге түсті. Бұл нәтижелер инвестиция тарту, өндіріс орындарын көбейту және жаңа жұмыс орындарын ашу бағытындағы жүйелі жұмыстардың жемісі болып отыр. Бюджеттің атқарылуы және осы саладағы өзекті мәселелер Түркістан облысының әкімі Нұралхан Көшеровтің төрағалығымен өткен жиында жан-жақты талқыланды. Өңір басшысы облыстың негізгі басымдықтары инвестиция тарту, өндірістік кәсіпорындарды дамыту және жұмыспен қамту деңгейін арттыру арқылы өзіндік кіріс көздерін ұлғайту екенін атап өтті. Сонымен қатар, жалпы жоспардың орындалуына қарамастан, кейбір аудан, қалаларда көрсеткіштердің төмен екеніне назар аударды.
Нұралхан Көшеров корпоративтік табыс салығы бойынша бірқатар мәселелер бар екенін айтып, жауапты басшыларға бұл бағыттағы жұмысты күшейтуді тапсырды. Оның айтуынша, бюджет кірістерінің әрбір көзі сапалы әрі толық орындалуы тиіс. Сонымен бірге бюджет қаражатының уақтылы және тиімді игерілуі қатаң бақылауда болуы қажет. Өңір басшысы өзіндік кіріс көздерін ұлғайту үшін инвестициялық жобаларды көбейтіп, жаңа өндіріс орындарын ашу бағытындағы жұмысты жандандыру қажеттігін атап өтті.
Түркістан облысының қаржы және мемлекеттік активтер басқармасының басшысы Гүлфари Әжіметованың мәліметінше, 2025 жылы өзіндік кірістердің өсу қарқыны 119 пайызды құрап, түсімдер 48 миллиард теңгеге артығымен қамтамасыз етілген. Салыстыру үшін айтқанда, 2024 жылы өзіндік кірістер көлемі 253,1 миллиард теңге болса, 2025 жылы бұл көрсеткіш 301 миллиард теңгеге жеткен. Бұл өсім өңір экономикасының кеңейіп, салықтық база нығайғанын білдіреді. Облыстық бюджеттің орындалуы да оң динамика көрсетті. 2025 жылы облыстық бюджет бойынша жоспар 109 пайызға орындалып, 11,3 миллиард теңгеге артығымен қамтамасыз етілді. Бекітілген жоспар 129,6 миллиард теңге болса, нақты түсім 140,8 миллиард теңгені құрады. Нәтижесінде облыстық бюджет түсімдері 24 пайызға немесе 27 миллиард теңгеге артып отыр. Бұл қаражат өңірдің әлеуметтік-экономикалық дамуына, инфрақұрылымдық жобаларды жүзеге асыруға және халықтың тұрмыс сапасын жақсартуға бағытталады.
Корпоративтік табыс салығы бойынша да өсім байқалады. 2025 жылдың қорытындысымен 5 454 корпоративтік табыс салығын төлеуші есебінен бюджетке түскен түсімдер 18 миллиард теңгеге артып, жалпы көлемі 47,5 миллиард теңгеге жеткен. Бұл көрсеткіш кәсіпкерлік белсенділіктің артқанын, өңірде жаңа өндіріс орындары мен бизнес субъектілерінің көбейгенін айғақтайды. Жалпы алғанда, Түркістан облысында 2025 жылы бюджет кірістерін арттыру бағытындағы жұмыстар оң нәтиже берді. Өзіндік кірістердің өсуі өңірдің қаржылық дербестігін нығайтып, әлеуметтік және экономикалық жобаларды іске асыруға кең мүмкіндік береді. Алдағы кезеңде инвестиция тарту, өндірісті дамыту және салық базасын кеңейту арқылы бұл көрсеткіштерді одан әрі арттыру көзделіп отыр.
