РЕСПУБЛИКАДАҒЫ МЕКТЕПТЕРДІҢ ТӨРТТЕН БІРІ ТҮРКІСТАН ОБЛЫСЫНДА САЛЫНАДЫ
Түркістан облысында жекеменшік мектептердің саны артады. Бұл бағытта инвесторларды тарту жұмысы күшейтіледі. Сондай-ақ шалғайдағы елді мекендерде тұратын оқушыларды арнайы автобустар тасымалдайды. Ол үшін жаңа автобустар сатып алынады. Бұл туралы Түркістан облысының әкімі Өмірзақ Шөкеевтің төрағалығымен өткен апталық аппарат отырысында талқыланды.
Өңір басшысы аудан, қала әкімдеріне білім ұяларының мәселелерін назарда ұстауды тапсырды. Адами әлеуетті дамыту басқармасымен бірлесіп, өзекті мәселелерді бірге шешуді тапсырды.
Республика бойынша 2021-2025 жылдар аралығында салынып жатқан мектептердің төрттен бір бөлігі – Түркістан облысына тиесілі. 4 жылда өңірде 199 мектеп бой көтереді. Былтыр бюджет қаржысына салынған 44 мектеп, жекеменшік 16 мектеп пайдалануға берілді. Облыстың бас ұстазы Дінислам Болатханұлының баяндауынша, биыл облыста 59 мектептің құрылыс жұмыстарын жүргізуге 20 млрд. теңгеден астам қаржы қаралды.
Аппарат отырысында өңірдегі қоғамдық-саяси ахуал туралы Түркістан облыстық қоғамдық даму басқармасының басшысы Аңсар Өсербаевтың баяндамасы тыңдалды. Облыста саяси ахуал тұрақты. Өмірзақ Шөкеев барлық аудан, қала әкімдеріне өзекті мәселелерді жедел шешіп, халықтың сын-ескертпелері мен ұсыныстарына шапшаң үн қатуды және қоғаммен байланысты нығайтуды міндеттеді.
