ХАЛЫҚТЫҢ 96,5 % ЭЛЕКТР ЖАРЫҒЫМЕН ҚАМТЫЛҒАН

108
0

Шымкент қаласы, Еңбекші ауданының әкімі Есілбек Досбол Күздікбайұлы Ақпараттық-коммуникациялық орталығында мемлекет басшысының тапсырмаларын орындау бойынша 7 айда атқарған жұмыстары туралы БАҚ өкілдеріне брифинг берді. Онда өңір басшысы атқарылып жатқан жемісті жұмыстар жайын сөз етті.

Өз сөзінде аудан әкімі «Қазіргі таңда аудан аумағындағы 19 шағынаудан мен 16 тұрғын алаптың халық шоғырланған негізгі бөлігі инженерлік жүйелермен қамтылған. Атап айтқанда, электр жарығымен 96,5%, ауыз сумен 94,5%, табиғи газбен 90,7%, кәріз жүйесімен 57% ға қамтылған. Қала әкімінің тапсырмасына сәйкес, Еңбекші ауданында инфрақұрылым жүйелерін дамыту бойынша 2022-2025 жылдарға арналған «Жол картасы» қалалық энергетика және инфрақұрылымды дамыту басқармасымен нақтыланып, бекітілген» деді.

Сонымен қатар күз, көктем мезгілдерінде жауын-шашын салдарынан болатын су басудың алдын алу мақсатында, 2021 жылы 14 мекенжайда 3,3 шақырым ирригациялық арықтар орнатылса, ағымдағы жылы  бірінші кезекте 7,3 шақырымды құрайтын 21 мекенжайға ирригациялық арықтар орнату жоспарланып, бюджеттен қаржы бөлінген.  Қалған 31 мекенжайға арық орнату  2023-2025 жылдар аралығында жүргізіледі. Еңбекші ауданы бойынша 630 көпқабатты тұрғын үйлер 435 аулаға біріктірілген. 2021 жылдан бастап «Халық қатысатын бюджет» жобасы аясында абаттандыру жұмыстары жүргізілуде. Аталған жоба аясындағы аулаларды абаттандыру өткен жылғы есепті кезеңмен салыстырғанда 1,8 есеге артқан.

Толығырақ тоқталсақ, 2022 жылы «Халық қатысатын бюджет» жобасының І кезеңінде 37 жоба бойынша 52 көпқабатты үйдің,  6 жеке секторлардағы балалар ойын алаңшаларын орнату жұмыстары жүргізілуде. ІІ кезең бойынша 12 жобаны іске асырып, 21 көпқабатты үйдің ауласын абаттандыру жоспарда бар. Қазіргі таңда мемлекеттік сатып алу жұмыстары жүргізілуде. Бұдан бөлек, ауданда биыл 4 спорт алаңша орнату және 5 спорт алаңшаны қайта құру жұмыстары жоспарлануда.

Еңбекші ауданы қаланың өндірістік ауданы болып саналады. Ауданда  «Оңтүстік» және «Ордабасы» индустриалды аймақтары мен «СЭЗ Оңтүстік» арнайы экономикалық аймағы орналасқан. Сонымен қатар аудан аумағындағы 20 359 шағын және орта кәсіпкерлік субьектілері тіркелген.