ТОҒЫСТА ИНФРАҚҰРЫЛЫМ ЖАҢҒЫРУДА

Шымкент қаласының әкімі Мұрат Әйтенов біраз уақыттан бері қалаға қарасты шағынаудандар мен елді мекендердің тұрғындарымен кездесіп, мәселелерін тыңдап келеді. Азаматтар тарапынан айтылған түрлі мәселелер бойынша дер кезінде тапсырмалар беріліп, олқылықтардың орны толтырылып келеді. Мәселен, жуырда шаһар басшысы қалаға іргелес жатқан Тоғыс тұрғын алабына барып, жұртшылықпен жүздесті. Сонымен қатар елді мекенде жаңғыртылып жатқан инженерлік инфрақұрылым құрылысын тексерді.

Қазіргі таңда мұнда 7500-ге жуық азамат тұрады. Мектеп, балабақша, мәдениет үйі, дәрігерлік амбулатория, спорт және балалар ойын алаңшасы, тағы да басқа әлеуметтік нысандар қарастырылған. Алайда атқарылуға тиіс біршама жұмыстар бар. Солардың бірі — ұңғыма салу. Бұл өз кезегінде Тоғыс, Айнатас, Елтай елді мекеніндегі 11 мыңға жуық халықты ауыз сумен қамтамасыз етуге септігін тигізеді. Қазіргі таңда құрылыс жұмыстары қарқынды. Тоғыстан 73 метрлік су ұңғымасы қазылып, болат құбырлар салынуда.

Айта кетерлігі, бұл су ұңғымасы қосымша ұңғыма ретінде жаз айларында қолдану үшін керек. Қала әкімі тексеру барысында жұмыстың белгіленген мерзімінен кешікпей, сапалы орындалуына күш салу қажетін айтып, жауапты мекемелерден нәтижелі жұмыс көрсетуін талап етті. Жалпы Тоғыс жұрты ауыз судан тапшылық көрмеген. Қамтылу көрсеткіші 98,5 % құрайды. Сол сияқты электр жарығын тұтынушылар да 99% шамасында. Биыл 11 абонентті жарықпен қамту үшін жаңадан бағаналар орнатылып, электр желілері тартылды.

Табиғи газбен қамтылу көрсеткіші де 98%-ды құрайды. Тек жаңақұрылыс аумағындағы 31 тұтынушының мәселесін шешу үшін келесі жылы жобалық сметалық құжаты әзірленеді. Мұндағы жолдарға да аса назар аударылуда. Былтыр 2 көше Ақмая мен Айыршық орташа жөндеуден өтсе, биыл 4 көшеге асфальт төселді. Жалпы мұнда 18 көше бар. Сонымен қатар осы жылы 2 көше С.Оспанов және Мұнайбарлаушылар көшесі жарықтандырылды.