ТЕОРИЯНЫ ТӘЖІРИБЕМЕН ТОЛЫҚТЫРУ ІСІНЕ АЙРЫҚША КӨҢІЛ БӨЛІНУДЕ
Бүгінде жастардың тәжірибесін ұштап, жұмысқа орналасуына мүмкіндік беретін бірқатар бағдарламалар бар. Қала берді, жоғары оқу орындары бірқатар өндіріс орындарымен екіжақты меморандумға отырып, түлектерінің сәтті жұмысқа орналасуына да мұрындық болуда. Бүгінгі материалымызда солардың бірі турасында тарқата жазғымыз келіп отыр.
М.Әуезов атындағы ОҚУ түлектерін жұмысқа орналастыру бойынша үшжақты меморандумға отырған болатын. Нақтырағы, меморандум «Оңтүстік Қазақстан металлургиялық компаниясы», «Шымкент металлургиялық компаниясы—ШМК», «Қазақстан-Қытай марганецті индустриалды тобы», «Абайл өндіріс» кәсіпорындары, М.Әуезов атындағы ОҚУ және Шымкент қалалық жұмыспен қамту және әлеуметтік қорғау басқармасы арасында түзілген. Мақсат — студент жастарды өндірістік тәжірибеде біліктілігін шыңдап, оқу бітірген соң тұрақты жұмысқа орналасуға жәрдемдесу. Шымкент қалалық жұмыспен қамту және әлеуметтік қорғау басқармасысы басшысы Балмаржан Нарбекованың айтуынша, жастар «Еңбек» бағдарламасының үшінші бағыты бойынша жұмысқа жолданып, квотамен елімізде еңбек етіп жатқан шетелдік мамандардың қасында жүріп тәжірибелерін шыңдауда. Кәсіпорындар да өндіріс орны базасында студенттердің оқу-тәжірибеден өтуіне қол ұшын созуда. Жобаға М.Әуезов атындағы ОҚУ алғашқылардың бірі болып таңдалуының себебі, мұнда студенттер техникалық мамандықтарды үш тілде меңгереді. Сондықтан ертең шетелдік мамандармен тәжірибе алмасуда тілдік кедергі ешқандай қиындық тудырмайды. Өз кезегінде «Қазақстан-Қытай марганецті индустриалды тобы» компаниясы басшысының орынбасары Нұрсұлтан Жезбаев университет түлектерін кәсіпорынға жұмысқа қашанда алуға әзір екенін жеткізген. Нақтырағы өз сөзінде «Біздің кәсіпорын «Оңтүстік» индустриалды аймағында орналасқан. Ферросиликонды марганец өндіреміз. Бүгінгі таңда зауытқа әртүрлі мамандықтар бойынша жүзге жуық жұмысшы қажет. Университеттің жас мамандары бізге келіп жұмыс істесе деген ниетіміз бар. Өйткені компания жұмысшыларға бар жағдайды жасап отыр. Үш мезгіл ыстық тамақ беріледі. Кәсіпорынның заманауи үлгіде салынған өз жатақханасы бар. Тынығып, демалу үшін бар мүмкіндіктер қарастырылған. Өкінішке қарай бүгінгі жастарда тез байып кетсем деген қате түсінік қалыптасқан. Себебі көп жастар жұмысқа тұрсам деген ниетпен келеді, бірақ кәсіпорынның ішкі тіршілігін көрген соң көп тұрақтамай кетіп қалады. Оңай жерде нан жоқ екенін қазіргі жастар білсе екен. Ешкімге бірден жоғары айлық, жауапты қызмет берілмейді. Мұның барлығы тұрақты жұмыстың арқасында, уақытпен бірге тәжірибенің қалыптасуымен болады» дейді ол. Қорыта айтқанда, бүгінде жастарға білім берумен қатар оқу орнын бітіргеннен кейін жұмысқа орналасу ісі де қарқынды жүргізіліп келеді.
