ЖОЛ САПАСЫ БАҚЫЛАУДА
Шымкент қаласында жол құрылысы қарқын алған. Қалаға қарасты шағынаудандар мен елді мекендерде құрылыс жанданған. Десе де сапа сын көтере ме? Көрсеткіштер не дейді? Жол активтері ұлттық сапа орталығының мамандары аталған сауалға жауап берді.
2019 жылдың наурыз айында Үкіметтің қаулысы бойынша құрылған «Ұлттық сапа орталығының» басты міндеті – үш бағытта жұмыс істеу. Біріншісі – жол жөндеу жұмыстары, сараптама жасау және де жол құрылыс материалдарына сараптама жасау, екіншісі — автомобиль жолдарына диагностика жасау, үшінші — ведомоствалық сараптама жасау. Осы уақытқа дейін филиал Білім басқармасымен бірлесіп, болашақ жол құрылысы мамандарын дайындау мақсатында кәсіби бағдар беру жұмыстарын жүргізуде. 2020 жылы 50-ге жуық мектеп қамтылса, 2021 жылы қаламыздың барлық мектептерінде (135 мектеп) кездесулер ұйымдастырылды. Ал 2022 жылы 70-ке жуық мектепте кәсіби бағдар беру жұмысы жүргізілген. Жол саласы мамандарының мәлімдеуінше, үш жылда сынақ зертханасы 745 сараптама өткізіп, 1 632 ақауларды анықтады, оның ішінде өрескел ақаулар саны — 150. Филиал қызметкерлері «Сапалы жол – адалдық алаңы» кеңсесімен бірлесе отырып, жол сапасына қатысты заң бұзушылықтарды анықтау мақсатында 24 рейд ұйымдастырды. Осы жылы да 205 нысанға рейд жүргізіліп, нәтиежелері бойынша 198 кемшілік пен ақаулар анықталды. Бұл жол белгілерінің беріктігі сәйкес келмеуі, бетонның сапасы сияқты ақулар. Сондай-ақ, сыналған 780 құрылыс материалының 556-сы талапқа сай келмейтіндігі анықталды. Сонымен қатар, Орталық тарапынан М.Әуезов атындағы Оңтүстік Қазақстан университетімен және Жол-көлік колледжімен болашақ жол мамандарына бағыт-бағдар беру мақсатында меморандум түзіліп, тұрақты түрде іс-шаралар өткізіліп тұрады. Үш жылдың ішінде 9 студент ақылы өндірістік тәжірибеден өтті, қазіргі таңда М. Әуезов атындағы ОҚУ түлегі сынақ зертханасында қызмет атқаруда. Айта кету керек, «Жол активтері ұлттық сапа орталығы» РМК «Жол балалдардың көзімен» атты балалар байқауын өткізіп келеді. Үш жылда 580 туынды ұсынылды. Сондай-ақ, кәсіпорын құрылған сәттен бастап «Таңшолпан» балалар үйіне қамқорлық көрсетіп келеді.
