СИТУАЦИЯЛЫҚ ОРТАЛЫҚТЫҢ ЖҰМЫСЫНЫҢ САПАСЫН КӨТЕРУ НАЗАРДА
Шымкент қаласының әкімі Мұрат Әйтеновтің қатысуымен өткен арнайы жиында ‘’i-shуmkent” ситуациялық орталығының жұмысын жақсарту тетіктері пысықталды. Шымкент қаласы әкімінің баспасөз қызметінің мәлімдеуінше, жыл басынан бері орталыққа 530 431 арыз-шағым түскен.
Соңғы кездері қоғамдық көліктердің жұмысына, жөндеу жұмыстарына қатысты жарықтың сөнуіне, судың тапшылығына байланысты арыздар жиілеген. Жиында азаматтар тарапынан түскен талап-тілектерді орындауда туындаған өзекті мәселелер талқыланып, шешу жолдары қарастырылды. 24/7 тәртібінде жұмыс істейтін орталыққа халық бірыңғай 109 нөмірі және арнайы әлеуметтік желілер арқылы хабарласа алады. Бүгінде орталық мамандары біліктілікті арттыру мақсатында арнайы курстардан өтуде. М.Дүйсенбекұлы жауаптыларға әрбір арыз-шағымға толық, сапалы жауап беріп, тиісті шаралардың қолданылуын бақылауға алуды тапсырды. Сондай-ақ әлеуметтік желілерде белсенділікті арттырып, халықпен кері байланысты күшейту қажеттігін ескертті. Ақпарат үшін айта кетсек, Шымкент қаласындағы ситуациялық орталығы мемлекет басшысының ’’Халық үніне құлақ асатын мемлекет” тұжырымдамасына сәйкес жүзеге асқан бірден-бір жоба. Тұрғындар психологиялық және заң көмегі, жалпы тәжірибелік дәрігерге (терапевт) жазылу, қоғамдық көліктер мен тұрғындар көп шоғырланған жерлерде жоғалған не тауып алған заттар, еңбек қатынастары мәселелері бойынша қоңырау шалып, мәслелерін шеше алады. Жалпы қаладағы «i-Shymkent» ситуациялық орталығының қызметі тұрғындары тарапынан жоғары бағаланып келе жатыр. Өңірлер мен елді мекендердегі өзекті мәселелер туындаған жағдайда тұрғындар бірден аталған орталыққа хабарласып, мәселенің мән-жайын біледі. Тиісті шаралардың дер кезінде орындалуына да мұрындық болады.
