САНИТАРИЯЛЫҚ-ЭПИДЕМИОЛОГИЯЛЫҚ БАҚЫЛАУ САЛАСЫНДА ӨЗГЕРІСТЕР БАР
Шымкент қаласының Ақпараттық-коммуникациялық орталығында Шымкент қаласының санитариялық-эпидемиологиялық бақылау департаментінің басшысының орынбасары Ахметов Алдарқұл Райымқұлұлының қатысуымен санитариялық-эпидемиологиялық бақылау саласындағы мемлекеттік қызмет көрсетудегі өзгерістер туралы баспасөз брифинг өтті.
Соңғы жылдары мемлекеттік қызмет көрсету саласына үлкен өзгерістер енгізілді. Халыққа мемлекеттік қызмет көрсету сапасын арттыруға бағытталған әлеуметтік маңызы бар нормативтік құқықтық актілер қабылданды. Осы әлеуметтік маңызы бар нормативтік құқықтық актілер негізінде қазіргі таңда Шымкент қаласының санитариялық-эпидемиологиялық бақылау департаменті және оның аудандық басқармаларымен төмендегі мемлекеттік қызметтер көрсетіледі:
— эпидемиялық мәні жоғары объектінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытынды беру (қызмет көрсету мерзімі – 13 жұмыс күні);
— қоршаған ортаға зиянды заттар мен физикалық факторлардың жол берілетін шекті шығарындылары мен жол берілетін шекті төгінділері, санитариялық қорғау аймақтары мен санитариялық-қорғаныш аймақтары бойынша нормативтік құжаттама жобаларына, шикізат пен өнімнің жаңа түрлерінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытынды беру (қызмет көрсету мерзімі – 10 жұмыс күні);
— халықтың санитариялық-эпидемиологиялық саламаттылығы саласындағы мемлекеттік бақылауға және қадағалауға жататын тамақ өнімдерін өндіру объектілеріне есептік нөмірлер беру және олардың тізілімін жүргізу (қызмет көрсету мерзімі – 5 жұмыс күні);
— патогенді биологиялық агенттермен жұмыс істеуге рұқсатты және оған қосымшаларды беру (қызмет көрсету мерзімі – 13 жұмыс күні);
— халықтың санитариялық-эпидемиологиялық саламаттылығы саласындағы маман сертификатын беру (қызмет көрсету мерзімі – 10 жұмыс күні).
Сонымен қатар, 1 мемлекеттік қызмет НҚА күшіне енгеннен кейін көрсетілетін болады:
— денсаулық сақтау саласында дезинфекция, дезинсекция, дератизация бойынша қызметтер көрсетуге лицензия беру («Салық және бюджетке төленетін басқа да міндетті төлемдер туралы» Қазақстан Республикасының Кодексіне (Салық Кодексі) өзгерістер мен толықтырулар қолданысқа енгізілген күннен кейін алты ай өткен соң күшіне енеді). Қызмет 2024 жылдың 1 шілдесінен бастап күшіне енеді (қызмет көрсету мерзімі — 15 жұмыс күні). 2014 жылға дейін алынған лицензиялар жарамсыз, ҚР 2014 ж. 16 мамырдағы «Рұқсаттар және хабарламалар туралы» № 202-V-ЗҚР Заңының 53-бабының 2-тармағына сәйкес күші жойылған.
