«ҚҰҚЫҚТЫҚ КӨМЕК» ЖОБАСЫ АЯСЫНДА ӨЗЕКТІ МӘСЕЛЕЛЕР ШЕШІМІН ТАБУДА
Елімізде мемлекеттік қызмет пен қоғамдық ұйымдардың жұмысы халықпен тығыз қарым-қатынасқа құрылуы тиіс екені бүгінде басты қағидатқа айналды. Президент Қасым-Жомарт Тоқаевтың «Халық үніне құлақ асатын мемлекет» тұжырымдамасын жүзеге асыру жолында түрлі партиялық және қоғамдық жобалар іске асырылуда. Соның ішінде «AMANAT» партиясының «Құқықтық көмек» жобасы — азаматтардың әлеуметтік және құқықтық мәселелерін шешуге бағытталған нақты қадамдардың бірі.
Осы жоба аясында Шымкент қаласы мәслихатының депутаты Абзал Зейнетаев азаматтарды жеке мәселелері бойынша қабылдап, тұрғындардың түрлі өтініштері мен ұсыныстарын тыңдады. Қоғамдық қабылдау ашық форматта өтіп, әрбір тұрғынның мәселесіне ерекше көңіл бөлінді. Қабылдауға келген азаматтардың өтініштері негізінен келесі бағыттарды қамтыды. Инфрақұрылымдық түйткілдер – жол, жарықтандыру, кәріз жүйелері, ауызсу мәселелері. Инженерлік желілердің жеткіліксіздігі – жаңа шағынаудандардағы электр, су, газ желілерінің жоқтығы немесе ескіргендігі. Әлеуметтік көмекке мұқтаждық – көпбалалы отбасылар мен әлеуметтік әлсіз топтардың өтініштері. Тұрғын үй жағдайы – жалға берілетін немесе сатып алу құқығымен берілетін үйлерге қатысты сұрақтар, кезек мәселесі. Бұл мәселелер — қаланың күн тәртібіндегі ең өзекті және көпшілік үшін маңызды салалар. Сондықтан халықпен тікелей жұмыс істейтін мәслихат депутатының оларды тыңдап, шешу жолдарын қарастыруы – жергілікті деңгейдегі басқарудың тиімді үлгісі. Қабылдау барысында кейбір мәселелер сол жерде жедел шешімін тапты. Абзал Зейнетаев тиісті мекеме өкілдерімен байланысып, нақты тапсырмалар беру арқылы бірқатар өтініштің жедел орындалуына ықпал етті. Ал қосымша зерделеуді қажет ететін күрделі мәселелер арнайы хаттамаға енгізіліп, бақылауға алынды. Бұл – әрбір өтініш ескерусіз қалмайтынын, әрі қарайғы шешімі нақты бақылауда болатынын білдіреді. Жауапты мекемелерге ұсыныстар жолданатыны айтылып, әрбір өтініш иесіне кері байланыс орнатылатыны да назарға алынды.
«AMANAT» партиясының «Құқықтық көмек» жобасы — халық пен билік арасындағы нақты көпір іспетті. Бұл жоба аясында азаматтар тек құқықтық кеңес алып қана қоймай, өз мәселелерін тікелей халық қалаулыларына жеткізуге мүмкіндік алады. Сонымен қатар, қабылдауға келген азаматтар мемлекеттік органдармен қалай жұмыс істеу керектігіне қатысты нақты ақпараттар мен бағыт-бағдар алады. Бұл – халықтың құқықтық сауаттылығын арттырумен қатар, билікке деген сенімін нығайтатын өте маңызды қадам. Қабылдау соңында азаматтар көрсетілген қолдау мен ашықтық үшін ризашылықтарын білдіріп, партия тарапынан жасалып жатқан нақты көмекке алғыстарын жеткізді. Бұл – халықтың қабылдау нәтижесін жоғары бағалағанының айғағы. Осындай ашық қабылдаулар – халықтың үмітін оятып қана қоймай, ел ішінде сенім мен тұрақтылықты нығайтуға жол ашады. Бұл – ел дамуының берік негізі саналатын азаматтық қоғамды қалыптастырудың нақты көрінісі.
