ТҰРҒЫНДАРДЫҢ МӘСЕЛЕЛЕРІ ТЫҢДАЛЫП, НАҚТЫ ЖАУАПТАР БЕРІЛДІ
Қоғам мен билік арасындағы байланыс неғұрлым ашық, жүйелі болса – мемлекеттік басқару соғұрлым тиімді әрі әділетті болмақ. Осы бағытта елімізде жүзеге асып жатқан «Халық үніне құлақ асатын мемлекет» тұжырымдамасы мемлекеттік органдармен қатар саяси партиялар қызметінде де басты бағдарға айналды.
Осы орайда, жуырда «AMANAT» партиясының Тұран аудандық филиалының Атқарушы хатшысы Есімхан Бертаев қоғамдық қабылдау өткізіп, аудан тұрғындарының жеке өтініш-тілектерін тыңдады. Бұл шара — азаматтардың күнделікті тіршілігіне қатысты түрлі әлеуметтік, құқықтық және ұйымдастырушылық мәселелерді шешуге арналған тиімді алаң болды. Қоғамдық қабылдауға келген азаматтар тарапынан төмендегідей маңызды мәселелер көтерілді — тұрақты табыс табу мүмкіндігін қарастыру, бос жұмыс орындары туралы ақпарат алу, тұрғын үй аулаларындағы қоқыс пен тазалықты сақтау, коммуналдық қызметтердің жұмысына шағым, көпбалалы аналар мен әлеуметтік осал топтарға мемлекет тарапынан қолдау көрсету, белсенді азаматтардың партия жұмысына араласуға қызығушылық танытуы, медициналық комиссия, құжат рәсімдеу, заңдық процедуралар бойынша кеңес алу. Бұл мәселелер — тұрғындардың әлеуметтік әл-ауқаты мен өмір сүру сапасына тікелей әсер ететін, өзектілігі жоғары салалар. Есімхан Бертаев қабылдау барысында әрбір азаматтың өтінішіне ерекше назар аударып, жекелей қарап, нақты жауаптар берді. Қоғамдық қабылдаудың артықшылығы да — бюрократиялық бөгетсіз, тікелей әрі бейресми форматта тұрғындардың мәселесін шеше білу. Қаралған өтініштердің бірқатары сол жерде оң шешімін тапты. Атап айтқанда, кейбір тұрғындарға жұмысқа орналасу бойынша бос орындар жөнінде ақпарат беріліп, тиісті мекемелермен байланысуға көмек көрсетілді. Әлеуметтік көмекке байланысты бірқатар сұрақтар бойынша жауапты органдарға ұсыныс жолданды.
Қоғамдық қабылдау кезінде заңдық тұрғыда бірден шешім шығаруға келмейтін сұрақтар да болды. Мұндай жағдайларда азаматтарға қолданыстағы заңнама аясында толыққанды түсініктемелер берілді. Бұл — тұрғындардың құқықтық сауаттылығын арттырып, шешім қабылдауда заңды жолмен әрекет етуге бағыттайтын маңызды қадам. Мәселен, мүгедектікке шығу бойынша келген азаматтарға нақты медициналық тексеруден өту тәртібі, құжаттар тізімі және уәкілетті органдардың өкілеттігі туралы ақпарат ұсынылды. «AMANAT» партиясының қоғамдық қабылдаулары тек формалды шара емес, халықтың шынайы проблемаларын тыңдауға және шешуге бағытталған жұмыс форматы екенін дәлелдеп келеді. Бұл жолы да Тұран аудандық филиалы азаматтардың үнін естіп, жауапкершілікпен қарады. Сонымен қатар, кейбір тұрғындар партия қатарына мүшелікке өтуге ниет білдіріп, өздерінің ел дамуына белсенді араласуға дайын екендерін жеткізді. Бұл – партия мен халық арасындағы байланыстың жанданып, саяси белсенділіктің артып келе жатқанын білдіреді. Тұран ауданында өткен бұл қоғамдық қабылдау — мемлекет пен азамат арасындағы сенімді нығайтуға бағытталған жүйелі жұмыстың бір бөлігі. Әрбір айтылған мәселенің елеусіз қалмай, нақты талқылануы, тиісті органдарға жолдануы – «тыңдай білетін» және әрекет ететін партияның іс жүзіндегі жұмысы екенін көрсетті. Мұндай бастамалар — азаматтардың билікке деген сенімін арттырып, қоғамдағы әділеттілік пен жауапкершілік ұстанымын нығайта түседі. Ал халықпен үнемі кері байланыс орнатып, олардың нақты мәселелерін шешуге мүдделі құрылымдар – ел дамуының сенімді тірегі.
