АСАР ШАҒЫНАУДАНЫ ТҰРҒЫНЫНЫҢ ӨТІНІШІ ОРЫНДАЛДЫ
Қала тұрғындарының жайлы әрі қауіпсіз ортада өмір сүруіне жағдай жасау — жергілікті басқару органдары мен қоғамдық ұйымдардың ортақ міндеті. Мемлекет басшысы Қасым-Жомарт Тоқаев атап көрсеткендей, «Халық үніне құлақ асатын мемлекет» қағидаты тұрғындардың шағымын естіп қана қоймай, нақты әрекетке көшуді көздейді. Бұл қағидат бүгінде Шымкент қаласының барлық деңгейінде сәтті жүзеге асуда.
Оның бір айғағы — Абай ауданы, Асар шағынауданы, Ақкөпір көшесі бойындағы қоғамдық орындарға қатысты тұрғындардың өтінішінің орындалуы. Көше бойындағы ескі орындықтарды жөндеу және бояу жұмыстары жүргізіліп, тұрғындарға қолайлы жағдай жасалды. Асар шағынауданының тұрғындары «AMANAT» партиясы Абай аудандық филиалының қоғамдық қабылдау бөлмесіне өтініш білдіріп, Ақкөпір көшесі бойындағы орындықтардың тозып, жарамсыз күйге түскенін, кейбірінің мүлде сынып, пайдалануға келмей қалғанын айтып, оларды жөндеуді сұрады. Бұл — бір қарағанда ұсақ-түйек мәселе көрінгенімен, қоғамдық кеңістіктің сапасына және тұрғындардың күнделікті тұрмысына әсер ететін маңызды жағдай. Тұрғындардың өтінішіне жауап ретінде «AMANAT» партиясы Абай аудандық филиалының Атқарушы хатшысы Әбдез Рахманұлы бұл мәселені Абай ауданы әкімдігіне жеткізетінін айтып, жағдайды бақылауға алды. Нәтижесінде, аудан әкімдігі тарапынан тиісті мамандар жұмылдырылып, Ақкөпір көшесі бойындағы орындықтарға жөндеу және бояу жұмыстары жүргізілді. Қоғамдық орындарға күтім жасау — тұрғындардың тынығу және қауіпсіздігі үшін маңызды қадам. Қала эстетикасына да үлес қосатын мұндай жұмыстар — тұрғындар мен билік арасындағы ашық байланыстың жемісі.
Қалалық инфрақұрылымның бір бөлшегі саналатын орындықтар — балалар мен қарттардың тынығатын орны, тұрғындардың серуендеп демалатын қоғамдық кеңістігі. Сондықтан оларды ұқыпты ұстау, уақтылы жөндеу — қалалық мәдениеттің, тұрғындарға деген құрметтің бір көрінісі. Аталған жұмыстардың жүзеге асуы — қарапайым тұрғындардың үнін билік тыңдап қана қоймай, жедел түрде әрекет етіп отырғанының нақты дәлелі. Бұл — бір реттік акция емес, азаматтардың өмір сапасын арттыруға бағытталған тұрақты жұмыс процесінің бір бөлігі. Мұндай тәжірибе тұрғындардың да белсенділігін арттырады. Өйткені кез келген адам өзінің шағымы мен ұсынысының босқа кетпейтінін, нақты шешімге әкелетінін көргенде, қоғам өміріне араласуға ынтасы артады. Бұл өз кезегінде азаматтық қоғамды дамытуға, ашық әрі жауапты басқару жүйесін қалыптастыруға мүмкіндік береді. Асар шағын ауданындағы орындықтарды жөндеу жұмыстары — бір қарағанда ұсақ мәселе көрінгенімен, билік пен халық арасындағы сенімді, жауапкершілікке негізделген қарым-қатынастың айқын көрінісі. Партия мен әкімдік бірлесе әрекет етіп, тұрғын талабын жерге тастамай, оны нақты іспен орындауы мемлекет пен қоғам арасындағы өзара сенімді нығайтады. Осындай жұмыстар тұрақты сипат алып, жүйелі түрде жалғасын тапқанда ғана қаланың әрбір бұрышы шын мәнінде тұрғындарға қолайлы, қауіпсіз әрі заманауи ортаға айналады.
