МЕКТЕП РЕНОВАЦИЯСЫ – БОЛАШАҚҚА САЛЫНҒАН ИНВЕСТИЦИЯ
Түркістан қаласындағы білім беру нысандарын жаңғырту – тек құрылыс мәселесі ғана емес, бұл – болашақ ұрпақтың сапалы білім алуына жасалған нақты қадам. Облыс әкімінің орынбасары Бейсенбай Тәжібаев Түркістан қаласындағы мектептерді қайта жаңарту барысымен арнайы танысып шықты. Бұл іс-шара – өңірдегі ауқымды білім реформаларының бір тармағы ғана емес, сонымен қатар әлеуметтік маңызды мәселелердің шешімін табуына бағытталған кешенді жұмыстардың айғағы.
2025–2027 жылдар аралығында Түркістан облысында 115 мектеп жаңғырту тізіміне енгізілген. Бұл бастама – облыс әкімдігі мен білім басқармасының ұзақмерзімді стратегиялық жоспарларымен тығыз байланысты. Жаңартылатын мектептердің бір бөлігі Түркістан қаласының өзінде орналасқан, онда жөндеу көрмеген 11 білім беру мекемесі таңдап алынған. Бүгінде 4 мектепте күрделі жөндеу жұмыстары қарқынмен жүріп жатыр. Бұлардың қатарында ел тарихы мен мәдениетінде айрықша орны бар тұлғалар атындағы білім ошақтары бар. Мысалы, №17 Ата Түрік атындағы мектеп-гимназиясы – 1800-ден астам оқушы білім алатын ірі оқу орны. Бұл мектеп 1989 жылы салынғанымен, осы уақытқа дейін ауқымды жөндеу көрмеген. Сондай-ақ, №31 Абай атындағы мектеп те жаңғыртудан өтуде. 1966 жылы теміржолшыларға арналып салынған бұл оқу орны бүгінде 1000-нан аса оқушыға білім беруде. Мектептің жаңғыртылуы Абай Құнанбайұлының 180 жылдығымен тұспа-тұс келіп отыр. Бұл – тарих пен қазіргі заманның символикалық тоғысы.
Қайта жаңғыртылып жатқан нысандар қатарында 530 орындық №7 С.Ерубаев атындағы мектеп-интернаты мен 1050 орындық №9 Н.Некрасов атындағы мектеп-гимназиясы да бар. Жөндеу жұмыстарының ауқымы тек ғимаратты қалыпқа келтірумен шектелмейді. Бұл мектептерге заманауи материалдық-техникалық база жеткізілуде. Яғни, жаңа құрал-жабдықтар, интерактивті тақталар, ІТ сыныптар және қауіпсіздік жүйелерімен қамтамасыз етіледі. Бұл – білім сапасын арттырудың негізгі алғышарттарының бірі. Түркістан қаласында 55 мыңнан астам оқушы білім алады. Ал жаңғыртылып жатқан 4 мектепте 7 мыңға жуық бала оқиды. Бұл жалпы қала оқушыларының шамамен 13%-ын құрайды. Яғни, бір реттік жаңғырту жұмыстарының өзі мыңдаған оқушының жағдайын едәуір жақсартуға мүмкіндік береді. Мұндай ауқымды жаңартулар – тек білім сапасына емес, мұғалімдердің кәсіби дамуына, ата-аналар сеніміне, және балалардың психологиялық жайлылығына тікелей әсер етеді. Жаңа әрі жайлы мектепте білім алу – оқушылар үшін мотивация көзі, ал мұғалімдер үшін шығармашылықпен жұмыс істеуге қолайлы орта.
Түркістан облысында білім беру саласына бағытталған мұндай реформалар тек ағымдағы мәселені шешуге емес, болашақтың білімді, бәсекеге қабілетті ұрпағын тәрбиелеуге бағытталған. Бүгін басталған құрылыс – ертеңгі интеллектуалды ұлттың іргетасы. Бұл үдеріс елдегі «Жайлы мектеп», «Оқу-ағарту инфрақұрылымын дамыту», «Цифрлы Қазақстан» сынды ірі ұлттық жобалармен де үндесіп жатыр. Жаңартылған мектептер – білім мен тәрбие беру ісін жаңа деңгейге көтеретін тірек нысандарға айналады. Түркістан қаласындағы мектептерді реновациялау – бұл тек ескі ғимараттарды жөндеу ғана емес, бұл – жаңа білім кеңістігін қалыптастыру, оқушыларға лайықты, қауіпсіз, заманауи орта құру. Білім – елдің болашағы десек, осы бағытта жасалып жатқан әрбір іс – ұлт келешегіне жасалған инвестиция. Жаңарған мектеп – жаңаша ойлайтын, елін сүйетін, озық ойлы ұрпақтың мекені болары сөзсіз.
