ШЫМКЕНТ ЦИРКІ ҚЫЗМЕТКЕРЛЕРІНЕ ҚҰРМЕТ КӨРСЕТІЛДІ
Қазақстан Республикасының Конституциясына 30 жыл толу мерекесі аясында Шымкент қаласының кәсіподақтар орталығында ерекше мәнге ие шара өтті. «Қызмет» салалық кәсіподағының Шымкент қалалық филиалы «Шымкент-Цирк» мемлекеттік коммуналдық қазыналық кәсіпорнының қызметкерлерін марапаттап, олардың еңбегін көпшілікке үлгі етті. Бұл жиын тек мерекелік сипатта ғана емес, еңбек адамының қоғамдағы орны мен мәртебесін арттыруға бағытталған маңызды қадам болды.
Мерекелік қабылдауды филиал төрағасы Серік Әуесханов ашып, қатысушыларды Ата Заң мерекесімен құттықтады. Конституция – ел тәуелсіздігінің, қоғамдағы тұрақтылық пен әділеттіліктің кепілі екені белгілі. Ал осындай айтулы мереке аясында еңбек еткен азаматтарды құрметтеу – халыққа қызмет етудің нағыз бағасы. Марапаттау рәсімінде түрлі маман иелері кәсіподақтың арнайы наградаларына ие болды. Мәселен, оркестр әртісі Серік Аппазов пен кәсіпорын директорының орынбасары Сұлтанхан Аманов «Еңбек озаты» төсбелгісімен марапатталды. Бұл атақ – ұзақ жылғы адал қызмет пен шығармашылық табандылықтың нәтижесі. Сонымен бірге хореограф Закира Намазбаева мен билет кассирі Перизат Қамшыбекова «Құрмет грамотасын» иеленсе, комендант Жасмина Жүніспаева мен цирк әртісі Нұржан Сапарбеков «Алғыс хатпен» марапатталды. Мұндай марапаттар формальді сыйлық қана емес. Олар – қоғамның мәдениет саласында еңбек етіп жүрген қарапайым жандарға деген ризашылығының белгісі. Әсіресе мәдениет мекемелерінде жұмыс істейтін қызметкерлердің еңбегі кейде көзге көрінбей қалатыны жасырын емес. Ал цирк ұжымы – тек өнер көрсетушілер ғана емес, сонымен қатар сахна сыртында еңбек етіп жүрген көптеген мамандардың бірлескен еңбегінің нәтижесі. Кәсіподақтар ұйымының рөлі де осы тұста айқындалады. Олар еңбек адамын қорғап қана қоймай, оның беделін арттыруға, қоғамдағы орны мен мәртебесін нығайтуға атсалысады. Конституция мерекесін еңбек адамын ұлықтаумен ұштастыру – азаматтардың құқықтары мен әлеуметтік кепілдіктерін қорғаудағы кәсіподақтың ұстанымын айқындап берді. Бұл шараның тағы бір маңызы – жастарға үлгі көрсету. Жас буын үшін еңбегі еленген азаматтарды көру – еңбекқорлық пен адалдықтың қадірін түсінуге мүмкіндік береді. Осындай марапаттар арқылы қоғамда «еңбек етсең – еленесің» деген сенім нығаяды.
Жалпы алғанда, «Шымкент-Цирк» ұжымына көрсетілген құрмет – мәдениет саласына деген назардың артқанының көрінісі. Әртістердің, ұйымдастырушылардың, техникалық қызметкерлердің еңбегі елдің рухани өмірін байытып, халықтың мәдени сұранысын қанағаттандыруға бағытталған. Ал олардың Конституция мерекесі қарсаңында марапатталуы – еңбек адамын ұлықтаудың озық дәстүрі ретінде бағалануы тиіс.
