КӘСІПОДАҚ ҰЙЫМЫ БАЛАЛАРҒА ҚУАНЫШ СЫЙЛАДЫ
Әрбір жаңа оқу жылының қарсаңында ата-аналарға айрықша салмақ түседі. Оқулықтар, оқу құралдары, мектеп формасы – мұның бәрі әрбір отбасының бюджетіне қосымша жүктеме түсіретіні белгілі. Әсіресе көпбалалы, әлеуметтік осал отбасылар үшін бұл мәселе айрықша өзекті. Сондықтан да мемлекет пен қоғамдық ұйымдар бірігіп, әлеуметтік қолдау шараларын іске асыруы – қоғамдағы әділеттілік пен қамқорлықтың айқын көрінісі. Солардың бірі – жыл сайын дәстүрлі түрде өтетін «Мектепке жол» республикалық акциясы.
Биыл бұл игі бастамаға Шымкент қалалық білім және ғылым қызметкерлері кәсіподағы комитетінің аппараты белсенді үлес қосты. Комитет қызметкерлері білім беру ұйымдарының қызметкерлерінің балаларына ерекше сый жасады. Тарқатсақ, Қайнарбұлақтағы әйгілі «Банан бауына» экскурсия ұйымдастырды. Бұл тек танымдық саяхат қана емес, балаларға қуаныш сыйлаудың, олардың дүниетанымын кеңейтудің айрықша тәсілі болды. Экскурсия барысында балалар табиғаттың ғажайып сырларына қанығып, өздерін қызықтырған сұрақтарды қойды. Банан бауы – тек көрнекі жер ғана емес, ауыл шаруашылығының дамуын, өңірдің табиғи ерекшелігін көрсететін бірегей нысан. Мұндай сапарлар балалардың туған өлкесіне деген сүйіспеншілігін арттырып, оларды табиғатты аялауға баулиды. Іс-шараның тағы бір маңызды бөлігі – балаларға жаңа оқу жылына арналған материалдық қолдау көрсету болды. Қалалық комитет төрайымы Лариса Тұрғынбаева оқушыларға мектепке қажетті тауарларды сатып алуға арнайы ақшалай сертификаттар табыстап, олардың жаңа оқу жылын сеніммен әрі шабытпен бастауына тілек білдірді. «Балалардың жарқын болашағы – біздің басты байлығымыз. Сондықтан біз әрдайым ұстаздар қауымына ғана емес, олардың отбасыларына да қолдау көрсетуді басты назарда ұстаймыз» деген сөздері – кәсіподақтың әлеуметтік жауапкершілікті терең сезінетінін көрсетеді.
Бұл бастаманың мәні зор. Біріншіден, ол әлеуметтік әділдікті нығайтып, білім қызметкерлерінің қоғамдағы беделін көтереді. Екіншіден, балаларға жасалған мұндай қамқорлық олардың рухани дамуына, жаңа оқу жылына жақсы көңіл күймен қадам басуына ықпал етеді. Үшіншіден, кәсіподақтың қоғамдағы белсенді рөлін, әлеуметтік серіктестік қағидаттарына адалдығын айқындайды. «Мектепке жол» акциясы тек материалдық көмек көрсету ғана емес, балалардың жүрегіне қуаныш ұялату, олардың бойына сенім ұялату екенін осы шара айқын дәлелдеп берді. Банан бауына саяхат жасаған бүлдіршіндер үшін бұл күн ұмытылмас естелікке айналды. Ал олардың көзіндегі қуаныш – қоғамның игілігіне бағытталған әрбір істің нағыз нәтижесі. Жалпы мұндай іс-шаралар – болашаққа салынған инвестиция. Балаларға қамқорлық жасау – мемлекеттің, қоғамның және әрбір ұйымның ортақ борышы. Шымкент қалалық білім және ғылым қызметкерлері кәсіподағының осындай бастамалары әлеуметтік қолдау саясатының маңызды бөлігіне айналып, көпшілікке үлгі болып отыр.
