ЗАҢДЫ БІЛУ – ЗАМАН ТАЛАБЫ
Шымкент қаласы білім басқармасына қарасты №132 жалпы орта білім беретін мектебінде құқық қорғау органдары, медицина қызметкерлері және төтенше жағдайлар бөлімінің мамандарының қатысуымен мазмұнды әрі тәрбиелік жиналыс өткізілді. Мұндай форматтағы кездесулер жасөспірімдердің қауіпсіздігін қамтамасыз етіп қана қоймай, олардың қоғамдағы жауапты азамат ретінде қалыптасуына ықпал ететін маңызды алаңға айналып келеді.
Жиынға директордың тәрбие ісі жөніндегі орынбасары А.Калменов пен Г.Джандарбекова, мектеп инспекторы А. Анапия, мектеп медбикесі Н. Туртаева және алғашқы әскери дайындық пәнінің мұғалімі Е.Батырбеков қатысып, оқушыларға тәжірибеге негізделген түсіндіру жұмыстарын жүргізді. Әр маман өз саласы бойынша маңызды ақпарат ұсынып, оқушылардың сұрақтарына жауап берді. Құқық қорғау органдары өкілдері жасөспірімдер арасындағы құқықбұзушылықтың алдын алу жолдарын түсіндіріп, заң талаптарын сақтаудың маңызын атап өтті. Оқушыларға интернеттегі қауіпсіздік, қоғамдық тәртіпке қатысты нормалар және өз әрекеттеріне жауапкершілікпен қарау мәдениеті жөнінде кеңестер берілді. Медицина қызметкері денсаулықты сақтау, зиянды әдеттердің жас организмге әсері және салауатты өмір салтын қалыптастыру туралы ақпараттармен бөлісті. Бұл бағыт оқушылардың ерте жастан денсаулықтың құндылық екенін түсінуіне мүмкіндік береді. Төтенше жағдайлар саласының мамандары қауіпсіз мінез-құлық дағдыларын қалыптастыру — әр оқушының өміріндегі маңызды міндет екенін атап өтті. Табиғи немесе техногендік жағдайларда дұрыс әрекет ету, қауіптен қорғану жолдары туралы түсіндіру жұмыстары жүргізілді. Іс-шара «Адал азамат» біртұтас тәрбие бағдарламасының негізгі бағыттарымен үйлеседі. Бағдарлама жас ұрпақты құқықтық сауатты, денсаулығына жауапты, қоғам алдындағы міндетін түсінетін саналы тұлға ретінде тәрбиелеуді көздейді. Оқушылардың қауіпсіздік мәдениетін арттыру — адал әрі парасатты азамат қалыптастыру жолындағы маңызды баспалдақ.
Жиналыс жасөспірімдерге нақты өмірлік кеңестер беріп қана қоймай, олардың дұрыс мінез-құлық дағдыларын дамытуға, өмірлік ұстанымын қалыптастыруға және қоғамның толыққанды мүшесі ретінде жауапкершілікті сезіне білуіне бағытталды. Мұндай жүйелі профилактикалық шаралар болашақта құқықбұзушылықтың алдын алуға, қауіпсіз орта құруға және жасөспірімдердің саналы дамуына зор ықпал етеді.
